National Highway-06 kawngpui zauhna tura mimal ram lak hek turah ram neitu leh kawng laih hna thawka zangnadawmna petu tur NHIDCL lam inremna fel tak awm hmaa he in thiah sak tumna chuan mipui dem a hlawh a, sawrkar thuneitute kaihhruaina hnuaiah zangnadawmna hi tihfel niin, cheng nuai 25 pek turin an inrem. Aizawl district huamchhung Seling khaw tawntirh lama in pakhat chu Thawhlehni khan kawngpui laih zau tur avang hian an bungrua thiarchhuakin a luahtu remti lo chungin thuneituten excavator hmanga thiah an tum a. He thil hi social media-ah a video a darh zui nghal vak avangin thiah zawh loin thuneituten an chawlh lailawk tir zui a ni.
Centre for Environment & Social Justice (CESJ) chuan he thilah hian thuneihna hmansual leh mi chak lo zawk rahbehna awm nia hria in hma an la a. Nilaini khan Seling Joint NGO nen tangrualin he in luahtu tana in sak that sak tura ngenna leh, an phu tawk compensation pe tura ngenpuiin Selingah kawng zawh a ni.
CESJ working chairman Vanramchhuangi chuan kawngpui laitu NHIDCL-in kan thing leh mau, nungcha leh luisa tibuai vek khawpa an sapatalna ti reh tura sawrkar thuneituten hma an lak that hleihtheih loh laiin, hmeithai harsa zawk chungah thuneihna an lek na leh hle si chu hriatthiam har an tih thu a sawi a ni.
Aizawl district CALA (Compensation and Land Acquisition) for NH-06 chuan hemi chungchang hi a sawifiah a. DC office-a record an neih dan chuan compensation latu hming hi Sawihara c/o Laltluangkimi a ni a. Ram lak tur chhut sak atanga zangnadawmna a dawn tur hi Rs. 8,25,268 a ni. Ram neitu hian a ram hlutna chhutsaknaah hian a inhnuai ber (basement) chhut tel a ni lo nia sawiin, compensation hi a la duh loa, chhut that sak a ngen anga chhutsaknaah Rs. 12,38,091 pek tura tih a ni.
DC office chhutsak thar anga compensation an lak theihnana theihtawp an chhuahpui laiin, NHIDCL hian pe duh loin chhut thar hi a hnawl vek a. Hemi kaihhnawiha hma latu ber Empowered Committee chuan ram laksak/ laih chhiat ngai hi dan tlawhchhan awm hmangin laksak turin a ti a; Ministry of Road Transport & Highways-in national highway laih zauh hna thawhnaah hma la chak tawk lo, tia a lo nawr sek bawk avangin hetianga hma lak ni ta a ni tih a sawi a ni.
‘Sawihara hi vawi tam a in leh lo zangnadawmna sum chhutchhuah tawh sa chu la a, insawn chhuak tura ngen a ni tawh a. Arbitrator-in CALA hnena ram khawih loh tura a tihna stay order pawh a hlip tawh a ni. Notice hi Sawihara hnenah hian vawi hnih – (2024 June 26 & October 27) pek a ni tawh a, chhanna hi ram neitu atanga hmuh a ni lo,’ a ti.
Hemi kaihhnawihah hian Nilaini khanTawi bialtu MLA, minister Prof Lalnilawma chuan a hmunah tlawhin, thil thlen dan hrang hrangte khawtlang hruaitute leh ram neitute bakah Aizawl DC office, Thingsulthliah BDO leh NHIDCL hotute nen an sawiho a. Ram neitu harsatna tawh mek chu a ranglama chinfel dan ngaihtuahpui a tum thu leh sawrkar hotu dangte pawh sawipui a tum thu ram neitu leh khawtlang hruaitute a hrilh a ni.
Kawng laih zauhna tura in thiah sak tum hnenah nuai 25 pe dawn
