Aizawl district magistrate chuan an district huamchhunga kawng sial mektute chu leivung paihna hmun tura ruatah chauh paih turin a ti a. A paih lo chu hrem theih an ni tih a hriattir.
Aizawl district magistrate thuchhuak chuan, an district huamchhunga kawng laih mekna hmun – NH 306 & 06 (Package 8) four lane Vairengte to Sairang Road, two lane Aizawl Bypass (lei verh telin), Aizawl Bypass western side-ah leivung paihna tur hmun ruat (designated spoil bank) vek a ni a. Contractor-ten leivung paihna tur hmun (spoil bank site) an rawtna uluk taka zirchian a nih hnuah District Level Monitoring Committee on Environment (DLMCE) chuan a paihna hmun tur hi a phalsak tih a sawi.
Heng project-ah hian leivung hi a paihna hmun tur ni loa paih an awm theih avangin, DLMCE chuan leivung paihna hmunah chauh paih turin hnathawktute a hriattir tawh a. A paihna tura hmun ruat lawk ni lo hmun danga paih an awm chuan, a mawhphurtu chu dan anga hrem theih an ni tih a sawi.
DLMCE tan heng kawng laih hna thawhna hmun hi chhunzan zawma vil reng theih a nih loh avangin kawng laih mek huamchhunga local council /village council, YMA, khawtlang thatna tura pawl hrang hrang ding leh mipui pawh leivung hi a paihna tur hmun dik takah paih a ni em tih enpui a, thu zawm lo chu thuneitute hnena thlen thuai turin an ngen tih a sawi a ni.
Kawng sialtute leivung paihna hmunah chauh paih turin chah
