Kawng siam that loh lai siamtha
Dampa bial chhunga kawng thawmthat mekah hnathawh tha lo lai chu bialtu MLA hmalaknaa siamthat tir leh a ni tih sawi a ni.
Dampa bialtu MLA Dr R Lalthangliana chuan a bial a fang mek a. Kar kaltaa Marpara leh Pukzing Vengthara SLT Infracon Pvt Ltd kawng siam chhe lai mipuiin a hnena an thlen chu endikin, PWD leh political party angin tumah a sawisel loa, kut lawnga khawh phawk mai theih leh, a kam sir pawh hawlh thlak mai mai theih a endik lai social media-a darh ta chu, a hna thawktu company-in an siamthat nghal avangin hlawk phah a tih thu a sawi.
MLA hian a endikna lai chauh ni lo, a kawng tluana siamthat ngaite siamtha turin thawktute a chah nghal tih a sawi bawk.
SLT Infracon project manager hmu in, sum tam tak senralna hna an thawk a, an hna chu a tha hle tur a ni, tia hrilhin, hna tha chu kut lawng leh hawlh avanga chhe mai mai thei tur a ni lo, tih a sawi a. A hma pawhin heng lai hnathawh hi khawtlang hruaituten a chhiat em avangin an lo chhun khawk vek tawh tih a sawi bawk.
“Kan rama hnamdang company hnathawkte hian, an thawh zawhah ngaihsak zui loa min hawsan leh mai thin avangin, an hna hi Mizoram tan tha leh rotling ni tura an thawh theihnan mitinin hma lakpui turin ka sawm a. A tirah tha tak angin lang mah se, an haw hnuah chhe leh mai thin tam tak a awm a, inkoh let a har tawh thin. Chuvangin company-te hnathawh uluk taka kan vilpui a ngai,” Dr R Lalthangliana hian a ti.
He kawng hi ZPM sawrkar thar siam ni loin, Dampa bialtu MLA hmasa Pu Lalrintluanga’n MNF sawrkar lai atanga theihtawp chhuaha a lo nawr tawh, a hlawhtlinna awm chho mek a nih avangin a chhiat a thatah a vei hle tih MLA hian a sawi bawk.
Kawng siam that loh lai siamtha
