Kawng siam turin sawrkar ngen

National Highway 44A, Tuidam – Darlak (via Sabual lui) kawng chhia siam turin a huamchhunga tlawngai pawlte chuan sawrkar an ngen.
Kawng chhia siam a nih theih nana hma lak dan turah Thawhlehni khan Taitesena Group YMA, Langkaih Group YMA, Hachhek MLA biala village council ho, political party aiawh, Hachhek bial Maxicab Welfare leh Langkaih Balu Phur Welfare aiawhte an inrawnkhawm a. Kawng siamthat thuai a nih theihnan hma la turin Taitesena Group YMA leh Langkaih Group YMA OB-te an ruat.
He kawng hi lirthei lian tan phei chuan zawh ngam chi a ni rih lo nia sawiin, lirthei lian (HMV leh MMV) chu kawng siamthat a nih hma chuan July 25 (Ningani) atanga zawh rih lo turin an ngen. Kawng hi a chhiat em avangin khualzin tan pawh nunna thapa zawh a ngai nia sawi niin, kumin June khan lirthei pathum chesualin kawng thlangah a lum tih sawi a ni.
Kawng chhia hi siam thuai a nih loh chuan chhiatna nasa zawk thleng thei a ni tih an sawi a. Siamthat thuai a nih theihnana hma la tura an ruat Taitesena Group YMA leh Langkaih Group YMA hruaitute chu, a tul a nih chuan mipui hnatlang ko mai turin an ti a ni.
Hetihlai hian Hachhek Constituency Development Committee chuan Hachhek bial huamchhunga an kawng dinhmun, Darlak to Tuidam an enin lungawithlak loh an ti a. He kawng hi khawthlang tana kawng pawimawh tak a nih avangin Mizoram sawrkarin a ranglama a chhelai siamthat sak turin an ngen. July thla chhunga a tha lo lai siamthat a nih loh emaw siamthat tumna a awm lo a nih chuan a tul angin hma lak an tum tih an sawi a ni.