Kolasib district-a kawngpui chhia siamthat a nih theih nana kawngpui siam mek enpui tura din Working Group chu Thawhlehni khan an chairman, addl DC B. Malsawmtluangi hoin an thukhawm.
Working Group chuan kawngpui siam hna thawh mekte chak zawka kalpui a nih theih nan hnathawhna hmunah enpui nise, an ti a. A hmasa ber atan vawiin – September 4 hian Kawnpui SDO (C) kaihhruaiin Kolasib leh Durlui (Sairang thlen hma) inkar en tum a ni. Hei bakah hian hun remchang hmasa berah Vairengte leh Kolasib inkar leh Bairabi leh Zero Point (Kolasib bul) inkar en leh tum a ni bawk.
Serkhan leh Saiphai inkar pawh enpui nise an ti a, hemi chungchang hi chu Kolasib bawrhsap ruahmanna siam dan ngaihchan nise, an ti. Kawng chhe zual siamthat hun chhung atana inremna an lo siam tawh pawhsei chungchang chu a ngai anga kal phawt nise an ti.
Working Group hi August 22-a lirthei neitu leh enkawltu pawl hrang hrangin Vairengte leh Sairang inkar leh Bairabi leh Kolasib inkara lirthei kal dan chah an huaihawt hnu, road block an tihtawp hnu a bawrhsap hoa din a ni a. PWD, Police, sawrkar lam aiawh, MJA, YMA, lirthei neitu leh khalhtu aiawhte leh NHIDCL aiawh an tel.
Kawngpui chhia siam dan enzui tura din an thukhawm
