Kawngpuia: Chhuanlam tur zawng lovin…

MPCC chuan thuchhuah siamin, Aizawl khawpui chhung kawng a chhiat vanga raipuar leh damlo phurh that ngam a ni tawh lo chu sawrkar inthlahdah vang a ni, an ti a. ‘Chhuanlam tur zawng ringawt a, insawifiah reng ringawt loin, hna tak tak thawk tan tawh turin kan duh,’ an ti bawk.
Kawngpuiah hian Mizoram hi a vanduai hle. Engtik lai mahin repair ngai lova kum li kum nga chhung rin theih kawngpui tha tak hi kan la nei ngai lo ti ila, a sual tam lovin a rinawm. Aizawl khawpui chhung kawngpui ngat phei hi chu, chhe miah lova fur khat tuar chhuak thei hi a la awm lo hial awm asin.
‘ZPM a sawrkar chuan kawng tlo lo hi a tlo nghal vek dawn’ tia chief minister thusawi chungchangah, ‘ZPM a sawrkar hnuah thal laia inbuatsaihna hun zau tak a awm chunga kawngpui thawmthat hna an thawk lo leh an thawmthat thenkhat pawh a beitham lutuk hi Congress party chuan mak a tiin PWD minister a dem takzet a ni,’ tiin thuchhuahah tarlan a ni bawk a.
‘A tlo nghal vek dawn’ han tih ngawt mai pawh hi, a lehlam tan chuan beihletna chance a tam duh dawn hle. Sawrkar hmasa lama hruaitute, an tawng chak ang huin an tawng an umpha lo thin nia sawi chu, sawrkar tharah pawh hian ‘tawng um pha lo’ tia sawi tur hruaitu hi an awm chho ve zut mai ang em tih pawh ngaihtuah theih tak a ni.
Eng pawh ni se, eng sawrkar mah hi kawngpui chungchangah kher kher hi chuan, han inchhuang fal thei tur hi an awm bik awm lo ve. State kan nih hnuah, Aizawl khawpui chhung kawngpui hi kum hnih chhung tal pawh major repair ngai lova a that tluan lai hi sawi tur hria kan awm ang em? tihtur khawpin kawngpui tha hi kan nei ngai lo.
Khawpui chhung kawngpui te hi chu, a lo berah pawh kum thhum chhung tal hi chu major repair ngai lova awm thei tur a ni a, chutiang kawngpui tha chhawpchhuak theitu nihna chance nei mek tuna sawrkar hian eng tin nge hma a lak ve dawn tih chu mipui thlir ber tur a nih hmel ta a ni.
Khawpui chhung kawngpui chhiat thin dan em em hi chu, a zahpuiawm lam deuh chu a ni. Min rawn tlawhtu khualzinmite pawhin mak an tih thu an sawi thin hi a mawh lo e. Tuna sawrkar mek hian chance tha tak a nei a, term khat an chelh chhungin Mizoram hi kawngpui tha a hlui thei dawn em tih chu mipui tehna tur pakhat a ni ang.