‘STOP Diarrhoea Campaign 2024’ chu Thawhtanni khan Mizorama district hrang hrangah hawn a ni a, Aizawlah chuan Tanhril Health & Wellness Centre-ah Health & Family Welfare principal director Dr Vanlalsawma’n a hawng.
Kumin thupuiah “Kawthalo ven nan faina leh ORS a pawimawh” tih hman a ni a. Health & Family Welfare hnuaia hmalaknaah hian Women & Child department pawh a tel a ni.
‘STOP Diarrhoea Campaign’ hi kawthalo do beihpui thlakna, kum 2014 atanga hman tan tawh niin, kum tin fur ruahtui tam hma/ tam laia hman thin a ni. Mizoramah pawh India ram hmun hrang hrang rualin hman thin a ni a; kumin hian July 1 atanga August 31 chhung hman tur a ni.
India ram pum huapin naupang thihna zaa 6 hi kawthalo vang a ni a. Hei hi Mizoram state dinhmun ni chi se, kawthalo hi naupang natna tlanglawn tak, enkawl thuai loh chuan thihpui theih natna a ni. STOP diarrhoea campaign chhung hian naupang kawthalo enkawl nana tha ber ‘ORS leh Zinc’ thatna nasa inzirtir a ni dawn a. ASHA-ten anmahni bial chhungah naupang kum 5 hnuai lam hnenah kawthalo enkawlna tur ORS an sem ang. Sawrkar damdawi in, Sub Centre leh Anganwadi Centre-ah ‘ORS-Zinc Corner’ siam a ni anga, heng hmun siam bikah hian naupang kawthalote chu enkawlna pek an ni ang. ORS siam dan, faina chungchang leh ORS leh Zinc pawimawhna chu thawktuten an lo hrilh thin dawn a ni.
Khawthalo veilo naupang tan ORS chu hmun ro thaa dahthat tur a ni a; khawthalo a neih chuan ORS pek thuai tur a ni. ORS packet dahthat chu a lo expire/chhiat tawh chuan a sak/ khal anga, chutianga a awm chuan paih tur a ni. ORS packet thar Sub Centre-ah lak tur a awm reng tihte sawi a ni.
Kawthalo ven beihpui thlak tan
