Taylor Swift leh Travis Kelce te chuan vawiin hian “Tiam tlat e,” an ti dawn ta. Sapram media ten an tarlan danin Swift leh Kelce te hi New York City-a Madison Square Garden-ah July ni 3-a innei tur an ni a, keini tan chuan vawiin a ni hman tawh ang. Swift leh Kelce te hian an inhual tih August 2025 khan Instagram-ah an puang a, kum khat dawn an inhual hnuah inneih dar an vaw dawn ta a ni.
Associated Press-in a tarlan danin Swift leh Kelce te hi July ni 3, Zirtawpni (keini tan Inrinni a ni tawh ang)-ah Madison Square Garden-ah an inkutsuih dawn a, New York official-te chuan July ni 2 zanah rehearsal dinner a awm dawn niin an sawi bawk. Associated Press chuan niminpiah khan Swift leh Kelce te hian Madison Square Garden chu inneihna atana hman phalna an la fel tawh niin an tarlang a, tlailam dar 5 atanga a tuk, zing dar 4 thleng atan an hauh niin an tarlang bawk.
An rama July ni 2-ah ‘pre-party’ celebration a awm dawn niin an tarlang a, hetah hian an thiantha leh laina hnai zual mi 100 bawr vel tel tur niin report a awm a, hei hi rehearsal dinner a ni nghal dawn a ni.
Swift leh Kelce te inneihnaah hian tute nge an sawm tihin ngaihven a hlawh hle a, an inneihna tur New York City a ni tih a chian hnuah Taylor-i thiantha Selena Gomez, Jack Antonoff, Sabrina Carpenter, Ed Sheeran, Aaron Dessner leh Camila Cabello te pawh New York City-ah an inlar ve nghal tlat a, anni ho hi mo lawmnaa tel ngei tura ngaih an ni.
Swift leh Kelce te chuan mo lawmna thilpek engmah keng lo turin an mi sawmte hi an hriattir nghal vek a, anmahni zawkin an inneih tur pual hian thilpek an pechhuak nual zawk a, US-a charity hrang hrangah dollar maktaduai 26 zet an sem chhuak zawk a, thilpek dawngtu zingah hian Grammy Museum Foundation, New York Cares, Kansas City-a Harvesters, Helping Harvest, Clevelend-a After-School All-Stars, Brad Paisley leh Kimberly William Paisley te The Stire food bank, Nashville te, Children’s Mercy Hospital, Los Angeles Regional Food Bank leh Rhode Island Community Food Bank te pawh an tel a, anni hian Swift leh Kelce te chungah lawmthu sawina te pawh an tichhuak nghal a ni.
Kelce rûn-ah Swift a lawi dawn e
