English Premier League club Everton chuan forward thar an nei a. Udinese atanga an lak luh Beto hi kum li liam ta khan KFC dawra thawk thin a ni. KFC dawra thawk thin kha, khawvela tualchhung league ropui ber EPL lian a zawm ta der.
Kum 25 mi Beto hian professional footballer nih ve ngei a duh a, KFC-a thawk chungin a theih ang angin football a khel ve thin. A khelhna hi Portuguese football -a fifth tier Uniao Tires-ah a ni. Amatuer club-a a khelh lai hian a khelhpuite hnenah professional footballer nih a tum thu a sawi a. Kum li hnuah professional footballer a nih theih leh theih loh chungchangah a khelhpuite nen hian an inthap hial nghe nghe. Kum 2021 a nih meuh chuan Italian Serie A team Udinese a zawm ta der.
A pumrua a lian a, thahrui a nei tha thawkhat bawk a, bakah a thawkrim em em bawk a, hma a sawn zel. Udinese tan hian inelna hrang hrangah vawi 65 a khel a, goal 22 lai a thun. A hmasawnna chak tak hian club lian leh hlun zawk beng a thleng a. EPL club Everton in £25m zet sengin an la lut a, kum li daih contract an ziahpui ta hial a ni.
Beto hian a club thar tan a khelh hmasak berah Carabao Cup-a Doncaster Rovers an hmachhawn tumin goal a thun nghal nghe nghe a. KFC a thawk chunga football khel thin Beto tan kawl a eng zel. Beto chak ber chu Cristiano Ronaldo nen Portugal tan khelh dun a ni a. Portugal hian an aiawha khel turin an la ko rih lo thung a. Everton-ah a chetha a nih chuan Ronaldo nen an la khelh dun theih ngei a beiseiawm.
KFC atangin Everton-ah
