Tunhnai ruah tlaah kawng chhe sa Khamrang to Buichali kawng chu a diak a, bungraw phur truck tlu a awm bakah tlan a buaithlak hle tih sawi a ni. PWD minister Vanlalhlana leh Kolasib bialtu MLA, deputy speaker Lalfamkima te chuan Inrinni khan an enfiah a. PWD engineer-te nen siamthat dan tur ruahman a ni.
Khamrang to Buichali inkar hi km 14.80 a thui a ni a. Hna hi contractor Ratna Infrastructure Projects Pvt. Ltd. thawh niin, 2021 May 7 khan an thawk zo a, maintenance period hi 2026 May 7 thleng tur a ni.
PWD report danin, he kawng hi 2021 November 16 khan NHIDCL hnenah Mizoram PWD chuan a hlan tawh a, NHIDCL hian PWD leh Ratna Infrastructure contract a la tawp lo tiin, kut an thlak duh lo. Contractor hian maintenance ti zel mah se, 2023 August 25 khan a tawpsan a ni.
Contractor-in a tawpsan hnu hian, kawng a chhe bawk nen PWD chuan a chhe zual boulder hnawhin a then lai concrete pavement siam a ni a. Boulder cubic metre 2387.05 hman a ni a, concerete pavement pawh metre 213-a thui a siam a ni. Hnathawhna hi fund hmuh a la ni loa, SASCI atanga ruahman niin, sum awm tawh mah se, pekchhuah a la nih loh avangin department chuan a la ba a ni.
Contractor-in hna a tawpsan avangin an contract hi kumin February 23 khan terminate/ foreclosed a ni a, performance bank quarantee cheng nuai 73 chu tunkar khan encashed tawh niin, he sum hmang hian thawmthat tum a ni.
A kawng chhe zual lai assessment siam a ni a, boulder cubic metre 2700 vel hnawh ngai tura chhut a ni. Kawng khuar lai hi excavator hmanga laih hnu ah boulder hmanga hnawh tum a ni. Heng hna bak hi chu sum hian a daih rih dawn lo nia ngaih a ni.
Khamrang- Buichali inkar kawng chhia siamtha dawn
