Sawrkarin dan hmanga halpuah leh halmawi lam chi a khap hnu ah pawh la hal lui chu an man nghal theih lohte pawh video evidence an neih chuan a hnu ah mana thubuai siamsak tho an tum tih Mizoram Police hotute chuan an sawi. Home minister K Sapdanga hoin Ningani khan kohhran hrang hrang thalai aiawhte an thukhawm a. Hunpui laia sawrkarin halpuah leh halmawi lam chi a khap chu a hlawhtlin theihna atan thawhho dan tur an sawi.
Home secretary Vanlalmawia chuan sawrkar hmalak tawh dan sawiin, Diwali laiin central force zingah halpuah halmawi lam lo tura an chahna chu zawm a hlawh viau a, hmun thenkhatah puak deuh awm mah se, a tam lo tih a sawi.
Home minister tawiawmtu Mizoram Police inspector general (Hqrs) Lalbiakthanga Khiangte chuan, sawrkar khap bawhzui hian police-in ruahmanna hrang hrang an siam a. Chu’ng zingah chuan halpuah/ halmawi hal luite umzui dan tur a tel tih a sawi. An man nghal theih chu manin thubuai an siamsak anga, inchhawng sang atanga hala an in gatepui kalh tlat ang chi, luh nghal mai theih loh chu video-in an la anga, a tuk lamah an umzui dawn tho tih a sawi. Hemi atan hian thla latu tur an rawih nual bakah tlawmngai pawl puihna an ngen a, thuhretua tan kawngah pawh tlawmngai pawl lam chu thawhpuiah an sawm tih a sawi a ni.
Kum kal tawh lama sawrkarin hal loh tur a tih laia hal lui, an mana thubuai an siamsak ho chhuiletin, la hal lui zel an awm meuh lo tih Police hotu hian a sawi a. Police chuan dan bawhchhiaa hal luite man tam a, case siamsak tam ngawr ngawr chu an tum a ni loa, kum lokal zel turah mipui inzirtirna atan hman an duh vanga heti anga hma la hi an ni tih a sawi a ni.
IGP hian kumina halpuah/ halmawi lam an man tawh zat leh kum kalta lama an lo man tawh dan a sawi bawk.
Thutkhawma Central YMA aiawha tel, assistant secretary Fabian Lalfakawma chuan, kumtinin Central YMA chuan halpuah/ halmawi lam hal loh hi thlawpin hma a la thin a, thlawp an hlawh tawk lo nia ngaiin an hnual deuh a, CEC thukhawm pawhin ‘minute’ ah meuh dahin, sawrkar hmalak tum dan ngaihchan phawt an lo ti tawh a, tun tuma sawrkar hmalak tum dan chu thlawp tlak nia an ngaih avangin theihtawpin hma an la zui ta tih a sawi a ni.
Kohhran thalai hruaitu kalkhawmte hian rawtna hrang hrang an siam a. Sawrkarin halpuah halmawi lam a khap chu an thlawp tih sawiin, rawtna an neihte an thlen nghal.
Halpuah/ halmawi hal, zawrh, kawl khap kaihhnawih:
8 Kuminah Mizorama district 11 zingah district 5 atangin man an neih thu report a awm tawh a. Tun thlengin district 6 – Siaha, Lawngtlai, Hnahthial, Saitual, Khawzawl, Mamitah man a la awm lo.
8 Aizawl district chu an man tamna ber niin, case 7 ziahluh a ni tawh a, an thil man hlut zawng hi Rs. 21,35,555 a ni. Lungleiah case 1, Champhai 3, Kolasib-ah man neiin thubuai siamsak tur awm lo (neitu nei lo) a ni a; Serchhipah 1 a ni. A vaiin case 12 ziahluh tawh niin, case chinfela court-a thawn – chargesheet tawh 2 a awm.
8 Aizawl tih loh, district danga an mannaah hian an thil man hlut zawng hi a tam tham loa, Aizawl telin, a vaiin an thil man hlut zawng hi Rs. 21,82,679 a ni tawh.
8 Kum kalta, 2023- 2024 khan Mizoram pumah thubuai ziahluh 5 awmin, inhnamhnawih mi 9 thubuai siamsak an ni a, an thil man hlut zawng hi Rs. 2,00,966 a ni.
8 Kum 2022- 2023 ah Mizoram pumah case 43 ziahluh a ni a, mi 48 man an ni. Hemi kaihhnawiha thil man hlut zawng chu Rs. 5,37,328.
8 Police-in halpuah/ halmawi lam an man hi tuiin an leih huh vek a, bawlhhlawh paihna hmun pangngaiah an paih zui thin a ni.
Khapna dan bawhchhiaa hal luite man nghal loh pawhin umzui tum
