US East Coast pumah mi maktaduai tam tak khaw lum hlauhawm takin a tuam mek a, ni eng emaw zat chu 38°C thlenga lum a awm zui tura ngaih a ni.
National Weather Service (NWS) chuan khaw lum uchuak tak leh boruak uap tak avangin July 4 kar tawp chhung hian Washington DC, Philadelphia leh New York khawpuiah te 46°C thleng a ni thei dawn tih a sawi.
President Donald Trump-a’n America din champha vawi 250-na puala lawmna a buatsaih bakah World Cup inkhel tur tam takte pawn lamah neih tur a la ni a, boruak lum hian a tibuai dawn em tih ngaihven a ni hlawm.
Khaw lum uchuak tak hian Europe pum tuamin nipui thawh tir lamah ram hrang hrangten a lum ber record an lo siam nual tawh a ni.
Midwest-a khaw lum tak chu hmarchhak leh Atlantic state an tih lamah a darh tan tawh a. Midwest atanga hmarchhak lam thlengin khaw lum uchuak tak a awm chhunzawm dawn tih chu Ningani khan puan a ni.
Ningani zing dar 9:00 (India-a zan dar 07:30) thleng khan Washington leh New York City-ah chuan khaw lum chu 32°C a hnaih tawh a. A hnuah Central Park-ah 38°C a kai a; mahse, boruak uap lutuk avangin 41°F ang maia lum a ni tih NWS chuan a tar lang a, kum 15 chhunga a lum ber tum a ni.
Chhim lam hret, ram khawpui berah chuan ni li chhung a zawnin 38°C kai thei a ni a, a hmain vawi hnih chauh hetiang hi a la thleng.
Ningani khan US Capitol Police chuan July 4-a Washington-a concert neih tur atana enchhinna neih turah hian mi pawimawh chauh an tel phalsak an dawn tih an puang a, hei hi khaw lum vanga mipui pungkhawmte an ngaihtuah vang a ni.
Trump-a chuan Inrinni hian independence day lawmnaah pawnah thu a sawi rin a ni a, khaw lum ni tura sawi ni mah se president hian pawna inkhawm a duh a ni.
America hmar lam thenawm, Canada-ah pawh tun kar chhungin khaw lum takin a tuam a, Ontario-ah chuan 37°C a kai.
Quebec hmun tam zawkah pawh khaw lum tur hriattirna siam a ni a, Montreal leh Quebec City-ah te pawh inring tura tihna tihchhuah a ni.
Khaw lumin Independence Day lawm tur US a tuam
