Khaw vawt vin tak leh chhumin
hmun tam tak la tuam dawn
India hmun eng emaw zat chuan chhum leivak zing chuai, chhun lam khaw vawt tak leh thlasik khaw vawt vin tak an la tuar chhunzawm dawn niin India Meteorological Department (IMD) chuan a sawi.
Hmar lam chu chhum leivak leh khaw vawt vin takin a tuam na zual dawn a. Hetih lai hian chhim lamah erawh Bay of Bengal-a deep depression awm mek avangin ruah tam tak leh tuipui phul nasa a awm thei dawn niin an sawi lawk.
IMD chuan zing lama chhum leivak zing nasa tak hi India hmarthlang bakah Bihar-ah ni sarih vel chhung, Nilaini vel thleng a la awm dawn niin ans awi a. Khaw hmuh theih chin leh ni tin vei velna pawh nghawng thei a ni dawn tih an sawi.
Chhum leivak hi ram laili, hmarchhak, West Bengal leh Sikkim-ah pawh Inrinni thleng la tam turin an sawi lawk a. Punjab, Haryana, Uttar Pradesh, Rajasthan, Uttarakhand leh Bihar-ah phei chuan Ningani vel thleng la awm turin an sawi lawk bawk.
Darkar 24 liam ta chhung khan Uttar Pradesh, Delhi, Rajasthan, Madhya Pradesh, West Bengal leh Assam-ah chuan khaw hmuh thui theih zawng chu metre 50 vel chauh niin Uttar Pradesh bikah hian Bareilly, Prayagraj, Kanpur leh Varanasi-ah phei chuan khaw hawi theih miah lovin a zing phui tlat a ni.
IMD chuan Uttarakhand, Punjab, Uttar Pradesh, Haryana, Chandigarh, Rajasthan, Madhya Pradesh khawchhak leh Bihar chu khaw vawt vin takin a la tuam zui dawn niin an sawi lawk a. Himachal Pradesh, Chhattisgarh, Jharkhand, Odisha leh Karnataka hmar lam laili hmun thenkhatte pawh khaw vawt tak hian a tuam dawn niin an sawi.
Thlasik kal mekah hian Jammu, Kashmir leh Ladakh hmun thenkhatah chuan 0°C hnuai lam pawh a awm nual tawh a. Rajasthan-a phaizawl, Sikar velah chuan 2.5°C a ni tawh bawk.
IMD chuan Nilaini vel thleng hian hmarthlang leh khawchhak lama khaw vawh dan tur hi inthlak vak a awm dawn lo niin an sawi a. Ram laili leh Maharashtra velah erawh 2–3°C velin a lum hret dawn niin an sawi thung.
Hetih lai hian Bay of Bengal chhimthlanga deep depression insiam chuan khawthlang hawiin hmarthlang lam a pan zel a, Sri Lanka vaukamah Inrinni hian khawmual a kai dawn.
Hei vang hian Zirtawpni leh Inrinni hian Tamil Nadu-ah ruah tam tak a sur dawn tih sawi lawk a ni a. Kerala-ah pawh Inrinnia sur teuh tura sawi lawk a ni.
IMD chuan tuipui a phul nasat dawn avangin sangha mantute pawh tuipuia chhuak lo turin an chah a. Darkar khata km 50–60 vela chak thlipuiin tuipui vel hi Inrinni thleng a nuai dawn niin an sawi a ni.
Khaw vawt vin tak leh chhumin hmun tam tak la tuam dawn
