Bangladesh atanga Mizorama tlanchhiat tum, BSF te’n an kirtirte chu khawchhe hnuaiah ramhnuaiah an biru mek nia hriat a ni a, mahni khuaa kir ngam lovin ramhnuaiah hian an tawm tih thu dawn a ni.
BSF te kirtirte hi June ni 15 tlai lama Mizorama lut an ni a, thu dawn danin, kar hmasa Inrinni tlai lamah khan Lawngtlai district-a Borkolok khaw hluia lo-ah an lut a, lo vela an awm lai hi BSF te’n an lo hmu a ni ang, kawngpuiah an lo chang a ni.
Heng lai velah hian 20th Bn BSF an awm a, hmun hrang hrangah an inzarpharh a ni.
Kamtali khua atanga thu dawn danin, BSF te hian Kamtali-a an camp-ah an hruai a, ei leh inte pawh an siamsak. Zan an riahtir a, a tuk Chawlhni tukah ramri-ah an dah a ni.
Tlanchhiate tam lam hi chiang faka hriat theih a ni lo a, mi 270 ti te, 207 ti te an awm. 200 chu an chuang a, naupang leh hmeichhia an ni ber a, tar an awm bawk tih thu dawn a ni.
Kamtali atanga thu dawn danin, BSF te hian ramri thlengin kein an hruai a, pitar pakhat chu a khua a sik nasat avangin damdawi te an pe a, motor-in an thlah.
Bangladesh-a an khua an lut lo tih thu dawn a ni a, ramri vela lo neite pawhin ramhnuaia an thawm an hre pha tih thu dawn a ni.
An khuaa kir leh hi a him lo a, lut dawn pawh ni se a ruka luh a ngai a, Bangladesh sipai an hlauh avangin Mizorama tlanchhe tur pawhin a ruka chhuah a ngai a, kir leh tur pawhin a ruka luh a ngaih bakah, a hnuah an inman chhuak ang tih thlenga a hlauhawm avangin khuaa luh ai chuan ramhnuai vela bikbo rih hi an duh zawk ang tih thu dawn a ni.
Bangladesh-a Chittagong Hill Tracts-a Bethel khua leh a chhehvela mi nia hriat an ni a, Bethel atanga Borkolok leh Kamtali hi ke-a ni khat kal vel ni mahse tlanchhiate hi kawnga kal ngam lo, biru chung kal, kual tak taka kal an nih avangin Borkolok khaw hlui thleng tur hian chawlhkar khat vel an thang tih thu dawn a ni.
Khawchhe hnuaiah raltlan kirtirte ramhnuaiah
