Tpa Bunghai
Khuang nufa a inchhawn dup dup a, YMA member thalai rualin khawhar in an pan nguah nguah a, khawhar chhungte puala YMA in bawm an dawhah pawisa an thlak sap sap a, thalai rual si nui tet tet leh khi sung awm miah lovin khawhar inah chuan an inzui lut zel a, a leng lo chin chu pawnah a remchan dan ang angin an inthiat far hlawm bawk a. Kil khata khawhar chhungte insut faih faih thawm chu rei lo teah thalai zai thawmin a khuh bo thuai a, khawhar hla lungrun em em mai te chu an sa indawt chho zui zat a – ‘Aw thihna luiral kan kai hun chuan…’ tih Pu Lalmama hla lungrun em em chho ah phei chuan meng phal reng an awm tawh lo – Mizo nih nawmzia leh YMA hlutzia hi khawhar chhungte bianga lawm avanga mittui tla ngiai ngiaiah chuan a va’n chiang teh lul em aw.
Khawhar chhungte lam atangin lawmthu sawina ri a innawn awn awn lo thei lo; chutah, Youtube lama Darzo leh Reiek YMA-in duhthawh taka lusunte an hnemna rawl ri a ngaihthlak thin ang maia an veng thalai rualin zai an han vawr zet mai chu lusun mek, Pu Hlima Sailo chuan an Br. YMA, Armed Veng South pawhin an lo tlin vezia te a sawi kai a, a U Rama thihna kara an lunglenna leh lusunna hnemtu YMA member-te chunga a lawmzia chu a mittui khap per sek chuan a va nemnghet chiang tak!
Br. YMA tin information center atanga khawtlangin chhiat a tawh thu puan a nih ruala chaw bar lai chawl dat a, mitthi in lam pan nghal thin YMA member-te hlutzia te hi ngaiah kan nei palh ang tih hi a va hlauhawm em! Thi tura piang te hian YMA kaltlanga malsawmna kan dawn nasatzia hre chungin – thlan lai thin tlangval, khawhar ina hmel hmuh tur awm thin nula leh tlangvalte hian Mizo society kalphung an man a, kawppui atan pawh an fuh nge nge. Khawtlang chhiat that nikhuaa inlan ngai lo nula leh tlangval hi chu an mawl tihna a ni mai – thlawt a! Chuvang tak chuan, mahni Br. YMA huam theuhah a bik takin chhiat ni a lusunte hnem thin YMA member-te hi kan khawtlang theuh hmel timawitute an ni a, phut let nei lo tlawmngaihna vawng nungtute hi ram hnuk an ni tih hre ranin i duatin i dawm deuh deuh ang u hmiang.