Kum 15 daih kawng siam tuma intiamtute sawrkarna hnuaiah Aizawl leh hmundang kawng khawi mah fur khat daih a awm ta mang lo tih Congress hruaitu Dr Lalmalsawma chuan a sawi.
Inrinnia Sihphir leh Lungdai inkar kawngpui chhia a tlawhnaah MPCC treasurer Dr Lalmalsawma Nghaka chuan, tun thal chhungin helai kawng hi siam thar vek ni mah se, thla 3-4 lek hnuah tlan ngaihna awm lo khawpin a chhe leh hman, tiin, kum 15 daih kawng an siam dawn tia mipui hmaa intiamtute sawrkarna hnuaiah Aizawl khawpui chhung kawng a ni emaw khaw kar kawng emaw a khawia mah fur khat daih an awm ta mang lo chu a vanduaithlak hle tih a sawi.
“Sawrkar kan hrawn mek hian an mawhphurhna, a fawng vuantu an ni tih inhai tawh loin, NHIDCL, BRO leh contractor-te mawhpuh tum zel tawh lo se a duhawm hle a. Kawngpui a chhiat avanga mipui tawrhna hi a pawi a, Lungdai, Serkhan, Zanlawn leh Bukpui tlangdungten awlsam taka an thlai thar Aizawl bazar-a an hralh thin chu kawngpui chhiat avangin a hralhnaah harsatna an tawk mek a, henglai hmun atanga Aizawl rawn thleng turin zankhua thak thak kal a ngai ta mai hi an lainatawm hle,” a ti.
Zin veivak leh lirtheia eizawngten nasa takin harsatna an tawk mek a, a bikin damlo inphurte tan phei chuan a manganthlak lehzual tih a sawi bawk.
Nikum September atangin mipui ip atangin kawng siamna tur chhiah (cess) tih luihna in sawrkarin a la a, kawng siamna atan tuialhthei chhiah a lak tlingkhawm chu cheng nuai 2300 dawn a ni tawh tih MPCC treasurer hian sawiin, “Kawngpui siamna atana lak, ti siin vawiina kan kawngpui dinhmun chu a chhe hle. Nimin maiah Aizawl bawlhhlawh paih lirthei khalhtute pawh kawng chhia siamin an hnatlang a. Chhiah nasa taka a pung chunga Mizoram history-a kawng a la chhiat ber tum kan thleng chho mek hi a inhmeh lo takzet,” a ti.
Kawngpui chhiat avangin sumdawngten loan hmanga an bungraw chah a hun taka a thleng thei loa, loan rulhnaah harsat tawk an awm mek niin Dr Lalmalsawma Nghaka hian a sawi a.Kawng chhiat avangin sumdawng tam tak an tlachhe mek tih a sawi.
Khawi kawng siam mahin fur khat a daih ta mang lo – Dr Lalmalsawma
