Aizawl Municipal Corporation chuan Aizawl mipuiin sa thianghlim zawk an ei theihnan leh thianghlimna kawnga ke pen zel turin ran talhna hmun Slaughter House hmun 12-ah a siam tan tawh niin Aizawl Municipal Commissioner chuan tunhnai khan a sawi a.
Tun dinhmunah hian Aizawl mipuiin ni tina sa kan ei thin hi eng tiang chiaha thianghlim nge a nih hriat theih lohin a tam zawk daih hi chu a awm mek niin a lang. A chhan chu, meat inspector-ten sa thianghlim leh thianghlim loh an endik thlapna awmchhun Mualpuia rural slaughter house-a ran talh hi, Aizawl mipuiin sa kan ei zawng zawng atanga chhuta per cent tlemte chauh a ni.
Mualpuia slaughter house hi 2013 atanga hman tan a ni a, ni tin bawng leh vawk 100 ve ve talh theihna tura ruahman ni mah se, ran dah lailawkna hmun ‘Lairage’ a awm mumal loh avangin Vawk phei chu a tir atangin talh a ni lo. Covid-19 kan hmachhawn hma 2018-2019 chhung khan kum khat chhunga he slaughter house atanga ran talh zat chu 7730 a ni a. Chawhrualin thla tin ran 644 talh ang a ni a; chu chu ni tin ran 21 talh ang a ni. Slaughter house-a sawngbawl loh ran talh a tam turzia chu heta tang hian a lang chiang mai awm e. Aizawla ran talhtute hian slaughter house awmchhun hi hmang vek dawn ta se, a ngaihna a awm lo a, meat inspector-ten an endik phak loha ran talh hi a tam hle tihna a ni.
Slaughter house hmang lo ran talhtute hi dem vak theih pawh an ni awm lo e. Chutih rual erawh chuan, endik loh, inspection certificate nei lo na na na chu an lo inthlahdah nge nge a; tun hnai maiah pawh, ran hri lenna ‘affected’ area huam chhungah dan kalha sa zuar an awm mai a nih kha.
Tun dinhmunah hi chuan, Inrinni bazar bikah, kan slaughter house neihchhun hian sa thianghlim leh thianghlim loh endik sa thlap hlir hi mipui a hlui thei lo hrim hrim a, mipui hian ‘inspected’ chauh hi lei duh pawh ni se, a ngaihna a awm ngang lo a ni.
Mualpui slaughter house a din hma hian, Bung Bangla thlangah slaughter house pakhat chu NEC funded-a sak a lo ni tawh a, a hmunhma a hlat deuh avangin transportation lamah harsatna a awm a, ran talhtuten an pan thei lova, a nihna tur anga chhawr tangkai theih a ni ta lo a. Lam hlat leh hlat loh hi kan buaina tur niin a lang lova, sawrkarin mipui hriselna tura a ruahman a nih chuan, transport subsidy scheme pawh siam mai tur niawm tak a ni.
Tuna hmun 12-a slaughter house dah tura ruahmanna hi chak taka AMC hian a kalpui a pawimawh hle. Hei hi peihfel a nih hma chuan tun dinhmun ang hian sa endik loh hi mipui hian kan la ei zel dawn a nih hmel. Sa talhna hmun kan neih belh hma pawh hian, ran natna hri leng reng bawk si nen, mipuiin sa thianghlim an ei theih nan eng tin emaw taka ruahmanna siam belh hi chu a tul hle niin a lang.
Khawi’maw sa thianghlim chu?
