Khawlum leh UV ray level sang
vangin school chawlh la rel lo
Tunhnaia khaw lum chhoh chak leh ultra violet ray level sang nia sawi a nih mek laiin, state sawrkar chuan school chawlh lailawk phah lam a la rel lo.
Tunlai khawlumin a ken tel, nizung atanga mihring tana tha lo thlen thei – ultra violet ray chu a level a sang hle tih sawi a ni. Mithiamte sawi danin, pawna inhliahkhuhna tel loa chhuah bawrh bawrh ngamna tawk hi UV ray index-ah 1-2 vel a ni a; high chu 6-7, very high 8-10 niin, ‘extreme’ chu 11 chin chunglam a ni. Hei hi tuna khaw awmdan mek nia sawi a ni a, state thenkhatah phei chuan school khar lailawk phah a ni.
The Aizawl Post zawhna chhangin School Education director Lalsangliana chuan tun dinhmunah UV layer level sang vanga school khar tumna a awm rih loh tih sawiin, “Department lamin kan ngaihven a, school naupang tan a him leh him loh chungchang mithiamte kan rawn reng a. An ni lamin mihring tana tawrh zawh loh leh hlauhawm tur a la awm rih loh thu te an sawi a. Mithiamte ngaihdan lak atangin tun dinhmunah chuan school khar tumna a la awm lo,” a ti. Hemi chungchangah hian school naupangte enkawl dan tur hriattirna thu an chhuah tur thu a sawi.
Chawlh thu puan ni lo mah se, school thenkhatah chuan ni sa lutuk avang hian tuktina an neih thin assembly/ line call dan pawh an tidanglam a, hlim awmna chinah an neihpui theih nan zirlaite a inchhawkin an neihpui dawn tih thu dawn a ni.
Hetihlai hian Lai Autonomous District Council-a Education & Human Resources department chuan Thawhtanni khan hriattirna tichhuakin, khawlum mek chu naupang leh mipui tana that zawkna turin an hnuaia primary school chu April 18 atanga thu leh awm hma chu zing dar 6-9 a school kal turin a ti.
Mizoram Pollution Control Board member secretary C Lalduhawma chuan UV level hi a hranpaa Mizoram chhunga teh a nih loh thu a sawi a. Boruak chhia nasa lutuk hlawmkhawm chu van sang takah chhum ang maia awmin, chhum anga ruahtui pai a nih loh avangin khua a tih lum phah ta hle tiin, The Aizawl Post zawhna a chhang a ni.
Khawlum leh UV ray level sang vangin school chawlh la rel lo
