Kan hma lawk chawlhkar thar lo awm tur April ni 21-a Aizawl khawpui enkawltu Aizawl Municipal Corporation inthlan lo awm turah political party tinte campaign an tang hlawm hle mai a, press conference an inneih chhawk zut a, ngawrh takin street campaign an kalpui bawk a. AMC election-a candidate nei party tin ten election manifesto an nei vek a. Manifesto-ah hian Aizawl khawpui an enkawl dan tur leh Aizawl khawpui hmasawnna tura hma an lak dan tur chipchiar takin an tarlang a, chu chu ziakin chhungkaw tinah an sem darh a.
Ziaka election manifesto an sem chhuahte hi tawngkaa han tuihnih emaw, han sawi zauna emaw hi street campagn-naah leh press conference an neihnaah te hian hriat tur a tam lo hle a; an auchhuahpui tam zawk nia lang chu, party insawichhiatna leh, a chang chuan mimal insawichhiatna te pawh a ni ta ve ang. Inthlan a awm chhan ber Aizawl khawpui hming hian sawi rik a hlawh tam ber tur a nih laiin, Aizawl khawpui hming aiin, party insawichhiatna leh thildanga inpuhmawhna thil hriattur a tam zawk hial awm e. Tu te emaw fiamthu ang deuhin, khaw pakhata football inkhelte chu an tang lutuk a, “football kha pawnah dah chhuak ula, football tel lovin ke lawngin i han inpet law law teh ang u an ti e” tih te kha kan iang mai dawnin a lang a ni.
Aizawl khawpui hi a tir atanga ‘planned city’ a nih loh avang hian hmasawnna hna han kalpui dawn pawhin a sak talh tawh mai a. ‘Tuiluankawr tha kan mamawh’ kan han ti hluai a; tuiluankawr siamna tur hmun awl tha pawh hi a awm thei tak tak tawh chuang lo; chutih rualin, a theih ang anga tuiluankawr siam pawh chu kan tum azeng lah a ni hek lo. Tuiluankawr kan ngaihthah avanga kum tin fur laia chhiatna thleng zozaite hi eng tin nge kan tih reh ang tih emaw, kan tih tlem ang tih emaw lam hi chu kan la hlat hle niin a lang.
Tunhma deuh khan thil hlui leh un humhalhtu pawl INTACH (Indian National Trust for Art and Cultural Heritage) Mizoram Chapter khan, Aizawl khawpuiin khawthlirna nuam Natural Heritage kan neih chhun, Chanmari leh Chaltlang inkar te, Bawngkawn leh Durtlang Leitan inkarte kha, humhalh tumin theihtawp an chhuah a, sawrkar leh AMC lamah pawh vawi duai lo an thlen thin a; mahse, AMC lam hian in sak phalna a pek zel avangin, khawthlirna thengthaw nuam tak Aizawlin natural heritage hlu tak a neih pawh hi inchhawng sang pui pui avangin a phui leh deuh vek tawh a nih hi.
Tunah pawh sipai chhuahsan ram chei that kan tum e kan ti a, natural heritage hlu tak, Aizawl ti Aizawltu pakhata ngaih thingkung upa leh hlu tak, kum 170 chuanga upa pawh, boruak tha min lo pek tawh zawng zawng leh a upatna ringawt pawh zaha duat tlak a nih vei nen, ‘hmasawnna daltu’ tia kihthluka kan vau leh ta khur khur mai te hi, inngaihtuah harh kan ngai niin a lang.
Khaw’nge Aizawl chu?
