Aizawl khawpui enkawltu tur AMC Corporator thlan thar mi 19-te chu nimin khan lakluh an ni a, Aizawl khawpui chu ZPM party kaihhruai AMC-in kum nga chhung a enkawl dawn a. Aizawl mipuiin beiseina sang tak an nei tih chu inthlan result atangin a hriat tawh a, chu lam chu kan tuihnih tawh lovang.
Khawpui sawrkar thar hian khawpui hmelhmang thar a siam thei dawn em tih chu mipui ten kan thlir tur ber a lo ni ta. Chipchiar takin hna an thawh dan tur chu election manifesto-ah khan an tarlang a, chung zinga pawimawh zual chu: inrelbawlna felfai leh langtlang (clean governance & transparency) te; sum hman dan langtlang (total transparency in financial management) te; Ward committee hman tangkai : Decentralisation hmanga hmasawnna hna thawh leh public funds hman dan dik te; Building Regulation 2007 & Site Development Modification Regulations 2017 ennawn leh siam that te; in sak approval rei lutuk tihtawp leh house construction awlsam zawk siam, tihte a ni.
ZPM party kaihhruai sawrkar thar a lo pian khan, ni 100 chhunga thawh tur kha ruahman a ni a, AMC sawrkar thar hian Ni 100 chhunga hlen chhuah tur emaw, bul tan tur emaw list hi an siam ve dawn em? tih hi mipui hian an zawt deuh niin a lang.
Eng pawh ni se, tihtur a tam a, siam that ngai a tam a, hma thar lak tur pawh a tam. Tun leh tuna hlawhtling nghal rum rum thei a ni lo tih chu a hriat mai a, mahse hlawhtling turin eng tin nge hma lak a nih tih erawh thlir ber tur a ni thung. Kum nga chhung chuan hna tam tak a thawh theih a ni.
Tuna khawpui mamawh hmasa ber nia lang chu ‘safety’ hi niin a lang. Tun hnaiah building sak dan dik lo leh lei laih chungchangah harsatna a lo lang leh ta a. Tlang pangah in kan sa a, kan inchherchhuan chhawng nasa em em mai a. Lei chakna kan inlaih chhiat sak a, kan inlai chim rem rum mai ni berin a lang. Hei hi leilung chakna enfiah (soil bearing capacity test) kan kalpui that loh vang a nih hmel a; awlsamna kan ngaihtuah luatah kan derthawng zo ta a ni ber.
Tuiluankawr (drainage system) mumal loh avangin leilung a derthawng bawk. Hei hi tun AMC sawrkar thar hian ngaihpawimawh hmasakah a nei dawn em? Tuiluankawr mumal loh avanga khawpui tawrhna hi a nasa tawh hle; sawifiah ngai lova lang chiang nghal vek a ni.
Khawpui sawrkar thar
