Khawsak harsate ration card eng/
pawla an awm dan enchian tum
Miretheite an ration card neih tur tak an nei em tih enchiang turin ‘Mirethei Pawl’ chuan district hrang hrangah fehchhuah an tum tih an sawi.
Mizoram Poor Federation hruaitute sawi danin, FCS&CA minister Pu B Lalchhanzova’n miretheite leh Zoram mipui dinhmun hriatchianna atan kan sum lakluh ang zela kan awmna tur theuh ration card-ah kan awm theihnana hma a lakna chu chief minister leh a cabinet-ten an pawmpuinaah a bikin miretheite an lawmin an lung a awi tih an sawi.
Hetihrual hian khawtinah miretheiten an chanvo tur dik tak an chang em, tih hriatchian an duh avangin Supply minister an kawm a, thahnem a lo ngai hle tih an hriatin an lawm a, amah leh sawrkar tawiawm tura a lo sawmna chu pawmin, a hmasa ber atan Champhai district-ah bul tanin miretheiten an chanvo tur dik tak ration card-ah an awm em, tih hre tura zin chhuah an tum tih an sawi a ni.
Kan khawsak dinhmun azira ration card eng/pawla awm tur ni si, ration card vara awm leh, ration card vara awm tur ni tawh awm tak ration card eng/pawla awm pawh a la awm theih theih an sawi a. “Kan sum lakluh leh khawsak dinhmun ang zela kan nihna dik tak ration card kan neih hi a thianghlim a, kan khawsak dinhmun azira card eng/pawl atanga card vara kan insawn hian, mi harsa zawkte tan hmun kan kian tih hi hria ila, Kristian kan nihna nen pawh a inmil hle a ni,” an ti.
Retailer thenkhatin ration latute hnenah thla thara buhfai an lak duh chuan thla hluiah an kutzungpui nem a ngai tih leh, thla hluiah an kutzungpui an nem loh avanga thla tharah an quota a thlen loh thu an sawi thin nia an hriat thu Poor Federation hian sawiin, hei hi inbumna a ni tih mipuiin kan hriat a tul. Hetiang thil hi tawk kan awm chuan mahni bialtu DCSO-a zawhfiah theih a ni tih an sawi.
Ration buhfai dahna buara chungchangah sawrkarin hma thar la a, ration buhfai latuten buhfai an lak zat tur dik tak leh buk tling ngeia an lak theihnan kudam-a buara rihna (gram 580) an paih nghal tih an sawi a. Retailer-in buara rihna chu buhfai atangin an cut a rem tawh lo, tiin, “Buhfai latuten buhfai an lak tur zat dik tak leh buk tling an lak theihnan sawrkawrin ruahmanna a siam hi a tul dan ang zelin kan bawhzui dawn a ni,” an ti bawk.
Khawsak harsate ration card eng/ pawla an awm dan enchian tum
