Khawthlang ramte aiin India-ah hmeichhe pilot tam – Scindia
Union minister Jyotiraditya Scindia-a chuan van sanga zinnaa hmeichhe tam lamah India chu a hmahruaitu a nih thu sawiin, “India-ah thlawhna khalhtu 15% hi hmeichhia an ni a, khawthlang ramte aiin an tam zawk,” a ti.
“India hi khawvel puma thlawhna khalhtu zinga hmeichhia an tamna ber niin US leh Europe ai pawhin as ang zawk,” tiin Morena, Madhya Pradesh-a Inrinnia Sukanya Samriddhi Yojana zauhna a hawnna leh Post Office Passport Seva Kendra sak tur lung a phumnaah a sawi.
“Modi-a hian hmeichhiate a dah pawimawh thu a lo sawi tawh thin a. Hma lam pan zelin hmeichhiate chawikanna hi kalpui zel a ni,” tiin Scindia-a chuan nu leh pate chu Sukanya Samriddhi Yojana scheme hnuaiah an fate tan account hawng turin a chah.
Kum 2015-a bul tan, ‘Beti Bachao, Beti Padhao’ campaign hnuaia Sukanya Samriddhi Yojana hi nu leh paten abn fanu naupangten nakin zela an zirna leh pasal an neih huna an senso tum khawlna tur scheme a ni a. Minister chuan Morena bikah hian he scheme hnuaiah hian accoint 34,000 hawn tawh a nih thu leh Rs. vaibelchhe 190 sum dah luh a ni tawh tih a sawi a. Madhya Pradesh pumah account maktaduai 2.8 hawn tawh niin Rs. vaibelchhe 7,300 dah a ni tawh a. Ram pumah account maktaduai 30 hawn tawh niin Rs. vaibelchhe nuai 2.1 dah a ni tawh bawk.
Scindia hmeichhe fate chu phur rit ni lovin nakin zel atana lungphum an nih zawk thu X-ah a tar lang a. “Keimah ngei pawhin Ashoknagar, Shivpuri leh Guna-ah hmeichhe naupang sang telah sum ka thawh a. He account hi mahni intun dinna tur chi a ni a, kawng sialtu leh chhuan tharte chawi kangtu a ni,” tiin Hindi-in a tar lang.
Scindia-a chuan Morena-in ama pual Passport Seva Kendra a nei tur chu mi chengten Gwalior, Guna leh Bhopal an pan ngai thin a titawp tawh dawn a, an tan a awlsam sawt dawn tih a sawi a. Center hian an thenawm district, Sheopur leh Rajasthan leh Uttar Pradesh ramri hrula mite pawhin an chhawr dawn tih a sawi.
Khawthlang ramte aiin India-ah hmeichhe pilot tam – Scindia
