Fisheries department leh YMA Tlabung Branch huaihawtin Thawhlehni khan Tlabung -Khawthlang Tuipuia Sangha Man Runpui neih a ni a. Hemi ni bikah hian nghakuai chiaha man niin, a man tha/ tam hnenah lawmman pek a ni.
Thawhlehni bikah hian sangha man zawng zawng belhkhawm hi kg 151 a ni a. A man lian ber David Zonunsanga Mission Veng Aizawl-in kg. 9.720 a man. Sangha man hnem ber chu F Lalmuanpuia, Tuithiang Veng Aizawl a ni a; sangha man thei zinga naupang ber chu Samson Lalramdina, Salem Veng Lunglei; a upa ber Lalnunsanga Varte, Mission Veng Aizawl a ni.
Hemi ni vek hian Fisheries secretary Er Lalrothanga leh DFDO Lunglei-te chuan Tlabungah Tlabunga sangha dil siamtute leh dil neitute kawmin an harsatna an sawipui a. Dil tui tling thei lo, sangha chi tha neih dan kawng, sangha mantute tanpuina tur, sangha chi intodelh kawnga training pek dan tur sawiho a ni.
Fisheries secretary chuan Tlabungah automatic water level tehna dah dan tur thlir a ni dawn tih a sawi bawk a. Hma sawn turin kuthnawktute rilru a pawimawh ber, tiin, tumruh turin a fuih.
Ruahman lawk ang chuan sangha man runpui, len hmanga sangha man chu vawiin – Ningani hian chhunzawm tum a ni.
Khawthlangtuipuiah sangha man runpui
