Khawtlang hruaituin zurui kut tuar

Kar kalta Inrinni zan khan Ramhlun North YMA vice president chu zurui pathumin kut an thlak a, thelh tumtu midang pakhat pawh na takin an hliam.
YMA Ramhlun North Branch thuchhuah siam danin, June 15 zan dar 6.30 vel khan Ramhlun North YMA vice president chu an venga khawhar ina a kal tur, an veng Presbyterian English School thlanga zurui pathum thawm na tak chu khawhar in bulhnaia bengchheng lo tur leh inthiarfihlim turin a hrilh a. Hei hi an ni hian ngaihua in an cho zui a, YMA hruaitu hian boruak tha lo zawk a thlen loh nan inthiarfihlim san a tum chu umzuiin an khawih ta a ni. Hetianga kut an thlak lai hmua thelh tumtu an veng mi pakhat – Lalduhzuala s/o K Lalruata pawh lo khawih ve in hliam a tuar a, damdawi in pan ngai khawpin an khawih tih a sawi a ni. He thil thleng hi YMA Ramhlun North Branch chuan na a tiin, a lungawi lo takzet tih a sawi.
Heng mi pathum – Penticosthanga s/o Lalchhuana, Ramhlun North; Lalhmangaihsanga s/o Chanchinmawia, Ramhlun North (a ni hi Khawlian khua, an venga in luaha awm) leh R Lalengliana s/o Lallawmawma, Ramhlun Vengthar te lakah hian Ramhlun North YMA chuan Bawngkawn Police Station-ah FIR an thehlut a ni.
An venga awm nghet awmchhun Penticosthanga hi an Branch-a YMA member ni zel tlakah ngai loin, YMA membership fee a pek tawh chu pek kir leh nise, an ti bawk.