Sazupui a ni a, a hmingah Herbie an phuah. Herbie chu Guinness World Records-in khawvela sazupui damlai zinga upa berah an puang a, an puan lai hian kum 15 leh ni 82 a upa a ni tawh. Sazupui dam chen hi a tlangpui thuin kum 8 vel a ni a, tha taka enkawl chuan kum 12 thleng te pawh an dam ve thei tih a ni a, mahse, Herbie hi chuan hei hi a pel thui ta hle a ni.
Herbie hi lionhead rabbit an tih ang chi a ni a, Surrey-a British nupa Richard leh Melissa Dunham te vulh a ni, Guinness World Record-in a kum an verify hun hi November ni 10, 2025 kha niin, tunah chuan khawvela sazupui upa berah an nemnghet ta a ni.
Richard leh Melissa te chuan Herbie hi kar riat a upa a nihin an vulh tan niin an sawi a, an sazupui dang Flopy thian atana an tih a ni. Flopy chu sazupui nu a ni a, Herbie chu a pa a ni. Melissa chuan, “Flopy hian a ngaina nghal hle a, an pahnih hian an inngaina nghal thuai a, kum 10 chhung chu tudang ngai lovin an inkawm a ni,” a ti.
“Herbie hi a chakin a zuang a zang a, a thatho em em reng thin a. A kum a naupan deuh lai chuan Richard-a’n a han um vel hi nuam a ti thin a, a tlan vak a, a ding a, a lo nghak a, um leh hun a nghakhlel thin. Mahse, tunah chuan a kum a lo tam ve ta a, han zuanglam peih vak chi pawh a ni tawh bik lo a, nilum aia bawh deuh vang vang hi nuam a ti ber tawh a ni mai e,” tiin Melissa chuan Herbie chanchin hi a sawi.
Khawvela sazupui upa ber
