Information, Public Relations, Printing & Stationery (IPRP&S) minister B Lalchhanzova chuan District Information & Public Relations Officer (DIPRO) office Khawzawl chu Nilaini khan a hawng.
Minister chuan, Information & Public Relations chu sawrkar hmalakna leh thuchhuah pawimawh mipui hriata puangzartu pawimawh a ni a, I&PR a chak loh chuan ram kalphung tam tak a tha lo zawngin a nghawng thei tih a sawi. Tunlai khawvelah thudik lo leh belhchian dawl lo a thang chak tawh a, I&PR chu chutiang thu dik lo doleta thudik tak leh rintlak chhuahtu pawimawh a ni, tiin, hemi kawngah hian Mizoram Journalists’ Association nen tha taka an thawhho a ngai tih a sawi a ni.
DIPRO office hawnnaah hian Khawzawl bawrhsap K Vanlalthiana, IPRP&S secretary Betsy Zothanpari Sailo, I&PR director K Vanlalsangi bakah I&PR hotu dangte, Khawzawla department dang hotute leh tlawmngai pawl aiawhte an tel a. Office hawn programme zawh hnu hian minister hian bawrhsap leh official dangte leh Khawzawl MJA member-te nen DC office-ah inkawmin DIPRO office building leh Khawzawl Press Club building sak tumna hmun atana ruahman an thlirho nghal a ni.
IPRP&S minister B Lalchhanzova hian Nilaini zing khan Champhaiah MJA member-te a kawm a. Aizawl pawn lam district hrang hrang atanga MJA khawmpui leh pawimawh thila member Aizawl kalte tana riah theihna tur hmun buatsaih sak turin an ngen a. I&PR Department Champhai-in anmahni puala office an la nei lo chu hma laksak thuai tura an ngen bakah office staff indaih lohna awm nia an hriat chu hnawhkhah sak thuai turin an ngen.
Sum zawnna atana tunlaia a hman apiangin Youtube hmanga chanchinthar rintlak loh leh finfiahna awm mumal lo, thlitfim pawh ni lem loa an tihchhuah thin chu tihtawp a nih theihnan hma lak a tul tih an sawipui bawk.
Khawzawlah DIPRO office hawng
