Khua lum mah se a tehna lamah la sang lo

Zoram lum hun a ni a, April thla atangin khua a lum. A mi chengte’n lum an ti a, mahse a tehna lamah chuan a la sang vak lo.
Directorate of Science & Technology enkawl State Meteorological Centre-a an chhinchhiah danin, kuminah Aizawl a la lum lutuk lo a, a lum ber laiin 32°C a la ni chauh.
32°C hi a lum tho a, mahse tuipui kam khua ni lo Aizawl tan chuan a sang vak lo. Khua a uap loh phei chuan humidity sannaa 32°C aiin a dai a, tin, kum dangah 32°C a lo pelh tawh thin avangin a tehna lamah chuan 32°C hi a sang han tih tur a ni lo ang.
State Meteorological Centre-a an chhinchhiah danin, 2017 April ni 13-ah khan a lum ber laiin 36°C a kai a, hei hi Aizawl lum ber lai a ni.
Lum leh vawt tehnaah hian ni khata a lum ber lai leh a vawh ber lai an chhinchhiah thin a, 2017 April ni 13-ah pawh hian a lum ber laiin 36°C a kawk tih a ni mai a, hemi ni vek hian a aia hniam a kawk char char tihna a ni.
1999 April ni 28 khan a lum ber laiin 36.1°C a lo kawk tawh a, 2019 May ni 13-ah khan 36°C a kawk tawh bawk. Ni dangah 36°C a la thleng ngai lo.
Kuminah hian April ni 25, ni 27 leh ni 28-ahte khan a lum ber laiin 32°C a kawk a, 36°C chu a hlat rih khawp mai.
State Meteorological Centre enkawltute chuan kumin hian Aizawl a lum har an ti a, hei hi ruah vang a nih thu an sawi. Ruah a sur leh thin avangin March thla pawh kha a la lum lo a, April-a khua a lum hnuah pawh ruah a sur leh thin avangin a dai leh thuai thin an ti.