Champhai district chhung, Khuangleng Secondary Collection Centre hnuaia sawhthing lakkhawm lei turin sawrkar leh company pakhat chuan inremna an siam a, sawhthing leina tur sum pawh cheng vaibelchhe hnih an pe lawk.Inrinni khan Mizoram Agriculture Marketing Board chairman, Agriculture & Farmers’ Welfare minister PC Vanlalruata hnenah Opickpure Organic Private Ltd. managing director Vikrant Singh chuan Aizawlah cheque cheng vaibelchhe hnih a hlan a. Hei hi Khuangleng SCC atanga sawhthing quintal 50000 leina tur a ni.
Hemi hnuaia inbiakremna ang chuan, sawhthing hi sawrkarin tuna floor price a bituk kg ah Rs.40-in an lei anga, sawrkarin a chingtute hnena a lo tiam lawk tawh angin, kg. ah Rs.50 aia hniam loa an hralh theihnan support price kg ah Rs.10 zel a chingtute hnenah a pe ve thung dawn a ni. Sawhthing lei sa dahkhawlna atan Opickpure Organic Pvt. Ltd. hmun mamawh ang chu sawrkarin a ngaihtuah sak dawn a. Khuangleng SCC hnuaiah hian sawhthing lei tum, kg ah Rs.40 aia to emaw a aia tlawm emawa midang inrawlh a rem dawn lo a ni.
The Aizawl Post-in a zawhnaah Opickpure Organic Pvt. Ltd. hotute chuan, Khuangleng SCC hnuai an thlan chhan kher hi sawhthing thar a tam vang a ni a, he SCC hnuaia khaw 12 atangin an lei dawn a ni. An sawhthing lei hi an sawngbawl hnu ah European Union ram hoah an thawnchhuak dawn a, anmahni hi Himachal Pradesh-a hmunpui nei an ni.
Agriculture minister sawi danin, Opickpure nen hian Mizoram-a sawhthing sawngbawlna hmun din turin inremna thu an lo thlung tawh a; tuna sawhthing an lei turah hian processing unit hi an la din fel loh avangin hmun danga an processing unit-a thawn turin an ruahman rih ang.
“Opickpure Organic Pvt. Ltd. hian sawrkarin floor price a siam angin an lei dawn a, a tahtawlin Secondary Collection Centre dangah pawh tih zel tum a ni ang. Nikuma ‘buyer’ te an inluh thelh nei nuai ang kha a fuh loin kan hria. Buyer lian zawkte an la rawn chechhuak mai loa, sawrkar chuan kuthnathawtuten a hlawkna a tam thei ang ber an tel theihna turin a bawhzui zel a, kg ah Rs. 50 mai ni lo, Rs. 60, 70, 80 thlenga an hralh theihna turin theihtawp a chhuah a, sawhthing chingtuten sawrkar hmalakna ngaichang thiam turin kan ngen a ni,” a ti a. A rate a lo tha ta lo a nih pawhin sawrkarin kg. ah Rs.50 in a leisak dawn tho tih hrereng turin an chah tih a sawi.
Mizoram sawhthing quality thatna chu state pawn lamin an rawn hriat tawh avangin rate hniam zawnga hralh an ui tawh a; organic certify phei chu kg ah Rs.80 aia hniama hralh tir an tum lo tih PC Vanlalruata hian a sawi a. State dang sawhthing, pesticide tam lutuk ho nena buk lung khata khai reng an duh tawh loa, quality vawn tlat an tum tih a sawi a ni.
Khuangleng SSC hnuaia sawhthing quintal 50000 leina tur sum pe lawk
