Kim-a leh a fanuin North Korean ralthuam enchhin enpui

Kim-a leh a fanuin North Korean ralthuam enchhin enpui
Kar liam ta chhunga US leh South Korea ramte South Korea-a kum tin nunchan zirna lian tak an neih thin an kalpui hnuah Inrinni khan North Korean hruaitu, Kim Jong Un-a chuan 600mm-calibre multiple rocket launcher 12 kah chhin a enpui niin sorkar chanchinbu, KCNA chuan a tar lang.
Kim-a chuan sipai nunchan zirna hian ‘km 420-a thui kah phak huam chhunga hmelmate chu lungawi lohnaah a hruai lut dawn’ a ti a, ‘nuclear ralthuam tha bikin a tihchhiat theih chu hriatthiamna thuk tak a pe dawn’ tih a sawi bawk.
KCNA-in thlalak a tihchhuaha a lan dan chuan Kim-a hi a fanu, amah thlaktu tur nia sawi rik, Kim Ju Ae-i nen ralthuam enchhinna hi an en dun a ni.
KCNA chuan, “Rocket kahchhuahte hian Korea East Sea-a km 364.4 vela hla chu kah fuh tura duan chu 100%-in a kap dik a ni,” a ti.
South Korean sipaite chuan Inrinni khan North Korea hian an ram hmar lam tuipui kamah ballistic missile 10 chuang an kap niin an sawi a. Missile hi an khawpui, Pyongyang bula atanga kah chhuah a ni a, an rama chhun dar 1:20 vela kah a ni a. Km 350 vela thui thlawk niin Seoul chuan a sawi.
Kar hmasa khan North Korea hruaitu, Kim-a farnu, Kim Yo Jong-i chuan US-South Korea sipai nunchan zir chu ‘mi cho phur thei leh indona atana thil enchhinna’ a nih thu a sawi a, hei hian an chhehvel boruak a timuanawm lo dawn niin a sawi bawk a. ⁠South Korea leh Washington chuan he nunchan zir hi invenna lam atan chauh a nih thu an sawi a, North Korea atanga sipai vauna laka an inpeih dan enchhin tumna a nih thu an sawi bawk.
North Korea hian kum 20 chuang zet chu ballistic leh cruise missile chi hrang hrang a enchhin tawh a, hei hi nuclear ralthuam a neih theihna tur kawnga a kal zelna a ni a, a hlawhtling tawh nia hriat a ni bawk.
Hei vang chuan Pyongyang hi kum 2006 atang khan UN Security Council hrekna hnuaiah a awm tawh a; mahse, sumdawnna, eibar leh ram venhimna lama harsatna nasa tak tawk chungin a kal zel tho a ni.
Ningani khan South Korean Prime Minister Kim Min-seok-a chuan Washington-ah US President Donald Trump-a a hmu a, North nena inbiakna hawn leh theih dan tur a sawipui a. Trump-a hian Kim-a nena thut dun theihna hun remchang eng pawh neih a duh hle niin South Korean hruaitu chuan thuthar thehdarhtute hnenah a sawi.