Khawvela tlang sang ber Mount Everest chhip-a tum khan an chuan chhuah ringawt pawh thil harsa tak, nunna thap a tlanglawnmi te an fehchhuah thinna a ni a, Kami Rita Sherpa leh Lhakpa Sherpa te pawhin Everest chhip an thleng leh ta. Sea level atanga meter 8,848.8 (feet 29,032) a sang Everest chhip hi an vawi khat lawn chhuahna a ni tawh lo, khawvel mipa leh hmeichhe zinga Everest lawn chhuak ngun ber an ni a, an record sawh nghetin an lawn chhuak leh ta a ni.
Kami Rita Sherpa, kum 56, hian May ni 17,2026, chawhma dar 10:12 khan a vawi 32 nan Everest hi a lawn chhuak leh ta a. Ani hian 1994 khan a vawi khat nan Everest hi a lawn chhuak a, chutihlai chuan kum 24 mi a ni a, chuta tang chuan kumtin deuhthaw Everest hi a lawn chhuak ta deuh a, kum khata tum khat aia tam lawn chhuah kum te pawh a nei.
Kami Rita hi Nepali, Everest lawn tur ten kaihhruaitu atana an hman thin a ni a, a Nepali guide pui Pasang Dawa Sherpa pawhin kuminah Everest hi vawi hnih lawn chhuak tawhin, a vaiin vawi 31 a lawn chhuak tawh a, Kami record a rawn hnaih tawh hle a ni.
Lhakpa Sherpa pawh hi Everest lawn chhuah tum te kaihruaitu a ni a, Nepal a piang ni mah se USA-a seilian a ni a, ani pawhin May ni 17, 2026 zing dar 9:30 khan Everest hi lawn chhuak ve lehin, a vawi 11 lawn chhuahna a ni a, hmeichhe zinga Everest lawn chhuak ngun ber a ni. Lhakpa hian 2000 khan a vawi khat nan Everest a lawn chhuak a, vawi ruk a lawn chhuah hnuah tlanglawn a chawlhsan a, kum 10 vel hnuah rawn kir lehin 2016 atang khan lawn leh tanin, hemi hnuah hian vawi nga a lawn chhua leh tawh a ni.
Lhakpa chuan Everest a lawn chhuah apiang chu thil thar zel ni a sawiin, “Ka lawn chhuah apiangin tlanglawnmi dang zel ka kaihruai thina, chuvangin ngaia neih theih a ni lo. Vur te pawh a tui ral nasa tawh a, a bikin a tlang chhim lamah a nasa lehzual. He tlang hi a danglam reng a ni. Mahse, ka rilru erawh a ngai reng. He tlang hi ka ngaina a ni,” a ti.
Kami Rita chuan a record siam chu khawvel hriata Nepal leh Sherpa-te phochhuaktu a nih avangin a ngaihlu lehzual niin a sawi a, chutih rualin Everest lawn chhuah chu tih than a awm thei lo ni a sawiin, “Ka lawn apiangin huphurhawm tak leh chona thar hmachhawn ang zel ka ni a, a kal khan te a inthlak a, a boruak bakah team nihphung te a lo danglam thin. Ka lawn ngun tawh avangin harsa lo angin a lang a ni thei a, mahse, thil hautak takzet a ni,” a ti.
Kami Rita chuan Everest a lawnchhuah tum hi an pung ta hle niin a sawi a, “Tun hnai deuh atang hian lawn chhuah tum hi an pung chak hle a, 1994/95 te kha chuan kum khatah mi 70 vel bawr te an lawn thin kha a ni a. Tunah chuan kum khatah mi 400 chuang te an kai ta,” a ti.
Tun tuma Kami Rita te lawn chhuah hnu lawk, May ni 20-ah pawh khan Everest lawn chhuah tumin mi 274-in Nepal side atangin an lawn nghe nghe a ni. Mahse, hei pawh hi ni khat thil thua Everest a lawn an tam ber tum a la ni ta chuang lo, May ni 23, 2019 khan Nepal leh Tibet lam atangin mi 354 ni khatah an lawn a, hei hi ni khat thil thuah Everest a lawn an tam ber tum a la ni.
Mount Everest chhip a lawn chhuak hmasa ber te chu New Zealand tlanglawnmi Edmund Hillary leh a Nepali guide Tenzing Norgay te an ni a, May ni 29, 1953 khan an lawn chhuak. Hmeichhe zinga Everest lawn chhuak hmasa ber chu Junki Tabei (Japan) niin, May ni 16 1975-ah a lawn chhuak ve thung. Mahni chauh a Everest lawn chhuak hmasa ber chu Reinhold Messner (Italy) niin, August ni 20, 1980 khan a lawn chhuak a ni.
King & Queen of Everest
