Govt. KM Higher Secondary School chuan Nilaini khan an school kawtzawlah Annual Sports kharna inkhawm an hmang.
He hun hmanpuitu I&PR minister Lalruatkima chuan India-in G20 presidency a chelh mek laia Mizoramin G20 delegate-te kan lo mikhualnaah Mizo hnam lam, nunphung leh zia phochhuahnaah KM HSS naupang costume parade leh hnam lam hrang hrang entirtu zinga an tel chu an duailo hle, tiin, ram leh hnam inpumkhatna kawngah sulsutu nih tum theuh turin a fuih.
Marksheet lama mark hmuh that ringawt a tawk loa, thiamna tak tak nei turin rinawm, taimak, tawrhchhel, thawhrim, beih fan fanna avangin kan hlawhtling thin tih sawiin, “Mark tha ringawt a tawk loa, thiamthei emaw thiam thei lo zirlai kan ni thei, a pawimawh ber chu huaisen taka inrintawkna leh tumruhna nena bei thinte hi an chungnungin mi hlawhtling an ni zel thin,” a ti.
Govt. KM HSS principal Lalnunzira Miller chuan an school chu India ram, hnam hrang hrang inlungrual taka an chenna ram nena tehkhinin, an zirlai engemawzat thenawm state leh Mizoram district 11 atangin an nei a, Zohnahthlak hnam hrang hrang bakah Reang (Bru), Chakma, Kawl, Nepali (Gorkhali) leh Bengali-ten inlungrual tak leh innghirnghona awm loin tha takin zirlaiten lekha an zir tih a sawi a. Sports kharnaah hian heng hnam hrang hrangte hian an hnam ziarang phochhuakin costume parade leh an hnam lam an entir a ni.
Govt KM (Khawpuia Memorial) HSS hi kum 1967-ah high school-a din niin, 1996-ah higher secondary-a hlankai a ni. Tunah zirlai 700 vel awmin, science leh arts bakah vocational subject – automative-IT a zir theih a, lecturer 38 leh support staff 10 an awm.
KM HSS annual sports kharna hmanpui
