Knock out ram kai hmasaber Mexico
Nimin zing khan si khat faia South Korea hneh lehin Fifa World Cup 2026 thlengtu ram pakhat Mexico chuan point ruk hmuin Group hma an hruai a, knock out stage lut hmasaber an ni.
Mexico coach Javier Aguirre a fimkhur a, a team enkawl chu world ranking-ah top 10 tal nih phakpui a tumna kal zelah tun tuma last 32 an chuangkai ta pawh hi a naute hnenah lawm (celebrate) chiam a la phalsak lo a, an hmabak la thuizia thlirin chuti lama insawrbing turin a hriattir.
He coach hian a team-in puitlin lam an pan zel thu leh inkhel hautak leh zamawm takah pawh dawhtheihna anlantir tlat avangin a fak a, chutih rualin, kum 2002 hnu lama a vawi khatna’na World Cup group an pelh hnuah inthlahdah thei leh knock out thleng lawma party buatsaih hun a la nih loh thu a naute a hrilh ngun hle!
Nimin Group A match-a si khat faia Asian giants South Korea an hneh hnuah a tum thumna atana World Cup-a Mexico kaihruai leh mektu Aguirre chuan, “Vawiin hian kan tihsual atangin kan insiamtha a, kan khel kha chu a hmuhnawm lo a ni mai thei e, mahse, kan game erawh a tha thlawt a ni.
“Kha miin a entir chu he team hi a puitling ve tawh a, dawhtheihna pawh kan lo ngah ta viau mai,” a ti.
Tunhma lama Mexican team a lo enkawl tawhte nena khaikhin tura an ngenna chhangin kum 67 mi chuan fiamthu a han thawh hlak a, “He team hian coach cool zawk a nei ta,” a ti!
Fiamthu bawka sawi zawmin, mobile phone hman rem loh laia hmang lui player-te nena inbauh vak vakte a sim tawh thu leh World Cup hnuhnung pahnih (2002 & 2010)-a Mexico a enkawl lai ai khan a nem tawh zawk a, in lak strict leh lutuk a ching ta lo nia sawiin, “Tunah chuan ap deuh tun reng ang kha ka ni ta lo a, kumte pawhin a chaldelh ve tate pawh a ni mahna, tunu pahnih kan nei ve tawhte hian min pui a ni bawk ang chu,” a ti.
Aguirre hian an hlawhtlinna hmasa lawma lam mai tur an la nih loh thu leh an final group match-a Czech Republic an sut leh tur lama insawrbing zui tura a naute a hrilh thu sawi chungin, a team enkawl chu hmathlir thui zawk nei tura a fuih thu a sawi.
“Ka naute hi world ranking-a top 10 thleng thei an ni tih inpawm tura hneh theih ka duh khawp mai a, chu chu thleng thei ngat ila kan tan a special vet vet dawn em asin,” tiin a squad enkawl mek tana a hmachhawp a sawichhuak.
Tournament bultanna inkhela South Africa lo hneh tawh Mexico hian nimin zing khan Guadalajara khawpuia an Group A match hnihnaah si khat faia South Korea hneh leh hram chungin knock out stage hmasaber round of 32 an lut.
Mexico hian South Korea goalkeeper tihsual an hlawkpui a, hun puma an goal khat neih humhim tura defensive game khawng tak an khelh zui theih an chakpui ta a ni.
An group ve vea hmahruaitu ni chunga last-32 match hnehna an chan chuan last 16 lamah Mexico leh England inkhel hmuh tur a awm thei dawn.
Ningani zing inkhela goal awmchhun hi first half tir lam minute 50-a Luis Romo chhuihluh niin, a team-mate Lee Gi-hyuk nena insut avangin Korean keeper Kim Seung-Gyu chuan a ball man tawh a thlauh leh a, chu ball ting kang tak mai chu Mexico midfielder chuan awlsam zetin goal-ah a thun fel et a, Guadalajara Stadium chhung thawm a tha kher mai!
First half tawp rual kha chuan Mexican fans thenkhat dawhtheihna tlachham tawh khan goal khung thei lo leh goal chhuah lek lek fo an pawlte khelmual chhuahsan tur kha an lo boo khum hman pek a, kha boruak leh goal lawm boruak chu inthlau tak a ni!
Asian team hian an siphurh sut turin hun remchang hmu zauh zauh mah se cross ball an nan fuh tawk loh chiah chiah thin avang te, goal tawh tura an ngaih Mexican goalkeeper Raul Rangel-a’n line atanga a ham chhuah leh hramte avang khan draw tal an beiseina a thamral ta a ni.
South Korea hian Mexico hnungzuia tlang chho ve turin beisei an la nei thiang a, a kaw tawpa tan khawh tur South Africa erawh an hneh tawh ngei a ngai thung ang.
He inkhela South Korea chance tha ber chu minute 87-a thleng niin, hnai bichilh tak atanga Cho Gue-sung tauhluh tur chu Raul Rangel-a’n dansakin, he Mexico keeper vek hian a chhunzawmna Yang Hyun-jun chanpual a tihsukuksak leh chiah bawk.
A tir lamah captain Son Heung-min chuan Rangel-a dan phak lohin chip lut dawn mah se line atangin Edson Alvarez chuan hmun himah ball a suanchhuak hman a, kha ball kha lut pawh ni se Tottenham forward hlui kha a offside avangin pawm a ni chuang lo ang.
|antu ngah Mexico lam pawh hian minute 75-ah angle chep tak atangin chance an hmu a, Raul Jimenez-a shot chu dansak a ni.
100% la chak Mexico hi Group A winner an ni chiang tawh a, hei vang hian last-32 zawha last-16 an lut leh a nih pawhin he match pahnih hi Mexico City-ah an khel thei dawn.
An bultanna inkhela Czech Republic hneh tawh South Korea pawhin tlang tura hun remchang an la neihah karleh Ningani khian Monterrey khawpuiah South Africa an tum dawn a, a hun inang chiahah Mexico-in Mexico City-ah hahchawl pahin Czech Republic an tum ve bawk ang!
Knock out ram kai hmasaber Mexico
