UD&PA department hnuaia bul tan, Kolasib khawpui bawlhhlawh paihna leh sawngbawlna hmun atana ruahman – Solid Waste Management Centre Dihmuntlang ami chu mimal kuta hlan tum a ni.
An chairman, district bawrhsap Robert C. Lalhmangaiha kaihhruaia Kolasib Town Sanitation Task Force thukhawm chuan, felfai zawka bawlhhlawh khawnkhawm dan tur leh vantlang mipuiin bawlhhlawh khawn man an chawi tur an sawiho a. Solid Waste Management Centre Dihmuntlang chu mimal kuta hlan (out-source) turin a thuphunga pawm a ni. He Centre pannaa electric hrui (line) tibuaitu thing, kuhva kung leh oil palm-in a tai theih ho then dan tur pawh sawi a ni.
Kolasib khawpui tui tlan ber Tuichhuahen a thianghlim zawk nan leh ‘Save Tuichhuahen River Campaign’ a hmalak zel dan tur sawiho a ni a. Kolasib khawpui tui tlan a lo thianghlim zawk theih nan septic tank mumal taka a paihna hmun buatsaih dan pawh sawi a ni.
Solid Waste Management Centre Kolasib chu Mizoram-in ‘Model Solid Waste Management Centre’ ah puan nise, tiin hma la mek mah se, Centre enkawlna tur hian fund allocation hranpa a dah a nih loh avangin directorate atangin a hun takah fund an dawn loh chang a tam tih sawi a ni a. Thawktu hlawh leh bawlhhlawh thliartute lawmman tur pawh thla tina an buai thin thu sawi a nibawk.
Chairman chuan Kolasib chu khawpui thangduang tak leh a chhunga mihring cheng pung zel an nih angin, bawlhhlawh leh hnawmhnawk pawh a pung zel a, buaipui tham a ni tawh, tiin, felfai leh tangkai taka sawngbawl a pawimawh a, mumal zawka bawlhhlawh khawnkhawma sawngbawl dan tur chu UD&PA department-in theihtawp chhuahin hma an la thin tih a sawi a ni.
Kolasib bawlhhlawh sawngbawl hna mimal kutah hlan a ni dawn
