Kolasib district-a Assembly bial pathuma MLA inthlanah thil rinhlelhawm leh enthat ngai hmuh a ni lo.
MLA inthlana vote thlak zawh taka Kolasib district-a assembly constituency pathum – Tuirial, Kolasib leh Serlui biala inthlan kalpui dan leh vote tlak dan thlir ho (post-poll scrutiny) chu heng bial pathuma general observer Anant Lal Gyani hoin Nilaini khan Kolasib ah neih a ni a. District election officer leh Kolasib Assembly bial returning officer John LT Sanga, Tuirial bial RO Melody Ngurthantluangi, Serlui bial RO Lalmuan Puia leh assistant RO-te leh political party aiawhte an tel a. Police observer S Chaitanya leh Kolasib district-a critical polling station 7-a micro observer-te an tel bawk.
He hunah hian Kolasib district-a bial pathuma zirbing ngai polling station-te thlir ho niin, thil felhlel leh rinhlelhawm a awm lo tih pawm tlan a ni.
Inthlan inbuatsaihnaah EVM/VVPAT khawl chiang lo thlak ngai pali a awm a. Polling station pahnihah inthlan vote thlak tan hmaa enchhin laiin VVPAT khawl chiang lo thlak a ni a; P/S pakhatah mock poll kalpui laiin EVM Ballot Unit thlak a ni. Vote 17 a tlak tawh hnua VVPAT thlakna P/S pakhat a awm bawk. Heng P/S-ah hian harsatna dang thleng loin tluang takin vote thlak zawh a ni.
Kolasib district-a assembly constituency pathumah hian polling station 89 a awm a, vote awm zawng zawng 63456 a mipa 30595 leh hmeichhia 32861 atangin vote thlak nana hman EVM-ah vote 52637 (mipa 24954 leh hmeichhia 27683) a tla a, 82.95% a ni.
Hriat theih chinah Kolasib district-ah postal ballot-a vote tla 975 a awm a. EVM vote tla leh postal ballot vote tla zat belhkhawm hi 53612 niin, hei hi vote awm thei zat (63456) atangin 84.49% a ni.
Kolasib district inthlanah rinhlelhawm hmuh a ni lo
