Mizoram Universal Health Care Scheme hman theihna Kolkata-a damdawi in pahnih chu Inrinni khan Health minister Lalrinpuii’n a tlawh.
A tlawh hmasak zawk Manipal Hospital Broadway, Salt Lake ami hi superspeciality hospital a ni a. Mizoram sawrkar empanelled hospital a ni a. Mizoram House Salt Lake bul lawka awm niin, Mizoram atanga damlo kalten an pan nasa in a tangkai hle tih sawi a ni. Minister hian an hmunhma leh hmanraw neih a enpui bakah Mizoram atanga damlo awmte a kan nghal a ni.
Manipal Hospital hian India ram puma hospital 49 a nei mek zinga 5 chu MUHCS hnuaia empanel niin, India ramah chuan hospital nei tam leh tha ber zing ami a ni.
Health minister hi Unit director Kakali Mukherjee leh a team bakah Dr Smartha Pulai leh a team-ten an lo dawngsawng a. Mizoram atanga damlo tam zawk an enkawl theihna atana hmalakna thar hrang hrang an neih an lo hrilhfiah a, damlo khumin a daih loh avanga day care centre an hawn belh atanga khum 35 chu Mizoram damlo tan bika an ruahman a ni tih an lo hrilh.
Experience nei Mizo nurse tam zawk thawk tura lakbelh an duh reng tih an sawi a. Hemi chungchangah hian minister chuan August thla chhunga recruitment buaipuia Mizorama lo zin turin a sawm a; Mizoram atanga damlote duat tak leh uluk taka an lo enkawl avangin lawmthu a hrilh bawk.
Kolkata-a awm Kolkata Kidney Institute a tlawhnaah an director Dr Pratik Das, senior consultant Dr Keshab Sil, consultant (Nephrologist) Dr Amar Pratap Singh leh nursing superintendent Chaitali Das Pradhan ten an lo dawngsawng. Kal thlak lama experiance nei tha tak tak doctor leh thawktuten man tlawm zawka kidney transplant an kalpui dan an lo enpui a. He hospital hi Mizoram atanga damlo, kal thlak mamawhte tana tangkai taka hman a nih theihnan inbiak chhunzawm zel nise an ti.
Kolkata-a damdawi in pahnih tlawh
