Rev Dr Ramengliana
Lung chhanga chantir tura thlemna kha Isuan Bible thu hmangin hneh takin a theh thla a. Thlemtu chuan fing takin Bible chang tlawh chhan ngeiin a rawn thlem leh ta a ni. Sam 91: 11, 12 “I chung thu-ah zawng a vantirhkohte chu thu a pe dawn si a. An kutin an dawm ang chia, chutilochuan i kein lung i chhuih dah ang e,” tih kha hmang tangkaiin, “He temple chung atang hian zuang thla rawh le,” a ti a ni. Chu thlemna chu mipui tam lai takin Jerusalem Temple chhip zum atangin a zuang thla ang a, vantirhkohvin an rawn dawm ang a, nat pawh na miah lovin a awm anga, tichuan, mi zawng zawngin mi bik a nih an hre thei ang, an thu an awih mai ang. Isua thlemna hi awl lo tak, sakhaw thil tak leh thlarau tak a ni kan ti lo thei lo a ni.
Miracle vs Kraws
Tunlai Kristiante thlemna tawh nen a inang kan ti em? Thilmak, miracle tih te hi kan ngaisang uchuak ta emaw tih theih a ni ta, thlarau nunah hian a ropui ber leh buaipui ber tur emaw kan ti fo bawk a. A chang chuan Isua leh Pathian Thu tak ai pawhin kan lawm zawk emaw tih theih a ni hial thin a nih hi. Kohhran ho hian kan um ber tur emaw ti tawk pawh kan awm! |henkhatin thlarau nun sang teh nan kan lo hmang fo bawk nen! Tu pawh hi kan Biak In chhip zum atangin zuang thla ta ila, vantirhkohvin rawn dawng chat mai sela, kan thu sawi midangin an ngaihthlak dan chu a dang ngawt ang. A video a viral nghal chur chur ang. Youtube channel hovin an kawm sup sup ang tih a hriat mai. Mahse chu kawng chu Kraws kawng a ni kher lo vang. Kraws kawng pumpelhna a ni duh zawk fo. Ni tina Pathian zawnna, rinawm taka beih fat fatna, Pathian nghahna nun a phawk chhuak zo kher lovang.
Kristian nun hi ‘miraculous life’ a nih laiin mihringte ngaiha miracle mak tak beisei reng mai hian thlarau nun hrisel lovin a rah chhuah niin a lang. Buaipui loh tur zawk buaipuia tha leh zung senna leh, beisei loh tur zawk beisei avanga nih tur ang nih lohna a thlen duh a ni. Hman deuhva Sailutara thil thleng buaithlak tak leh mualphothlak angreng tak pawh kha Kelkang boruak ang neih ve tum kherna vanga lo chhuak niin a hriat theih dan a awm. Kan tum tak hi kan thelh thin. |helh turin Thlemtu hian min lo thlem ve char char thin bawk nen. Eng dinhmunah pawh ding ila “Ka nunah hian Krista chu engkim dang aiin ka thlang ber zawk em?” tih zawhna hi kan inzawh reng zawk tur leh kan buaipui zawk tur chu a ni awm e. Isua pawh a kraws kawng pumpelh turin miracle-a innghat thil hmanga thlem a nih ang hian tam takte hi min thlem ta em ni?
Pumpelh a ni em?
Chu thilmak hmanga mi hneh tumna kawng awlsam zawh tura thlemna chu chhangin Isuan, “Lalpa i Pathian fiah suh,” tih a ni ve bawk e, a ti hmiah mai a nih kha. Vawiina thlemna kan tawn tam tak, mimal nuna vawi tam tak kan tawn tawh pawh a ni ang, Pathian fiah tumna hi a tam duh khawp mai. “Lalpa chutia i tih chuan chutiang chuan ka awm ang….chumi a thlen chuan chutiang chu a ni ang….chutianga a tih loh chuan ka ti thei bik lovang….Pathian a nih chuan chuti chuan a ti tur alawm! ” tih thlengin kan rilruah phutna a awm thin. Isua thlemna tawh pahnihna ang chi hi a ni ngei ang.
Kan duh dana Pathian beiseina hi awm thei tak a ni a. Ringtu chuan Pathian hruainaa innghatin a zui mai tur ni zawk awm tak a ni. Kan duh ang Pathian tih tir tum aiin Ama duh ang ni zawk tur a ni. Chu mi kawngah chuan Pathian thiltih mak kan hmu ngei ngei zawk dawn a ni. Krista hnungzuitu tak takte testimony-ah chu chu a awm ngei ngei thin a ni. Pathian hian pangngai takin amah ringtute nunah chuan a inrawlh reng a, chu chu thlarau mit varte chuan an hmu thiam thin. Tunlai khawvela thil pawi tak chu Pathian hnathawh leh thilmak danglam tak hmehbel kan tum kher thin hi a ni.
Mi hip tam kan tum dan thleng hian
Isua tan pawh khan kha kawng zawh mai kha kawng awlsam zawk a ni a. Thingtlang khaw lam atanga tan a, mi mawl te te te zinga rawngbawlna tan a, sakhaw hotu leh sorkar miliante huat hlawh chhoh ai chuan Jerusalem temple chhip atanga zuan thlak a, vantirhkoh inhumhim tir a, mi zawng zawng hneh chu a awlsam zawk ngei ang. Miin Messia a nihzia an pawm zung zung zawk ngei ang a. Ringtu pawh an pung nasa zual zawk ang chu mawle! Mahse chumi kawng chu Isuan a hnawl. Pathian ruat kawng a ni kher lo tih kan hria. |henkhat phei chuan sawi mak leh sawi huai apiang hi an thlarau mi emaw an ti ta lehnghal a, thlemtupa a hlawhtling thin hle a ni.
Pathian rawng kan bawl dan te pawh hi enfiah fo a tha. Chanchin |ha hril leh Healing Crusade han tih kawp tlat mai te hian Chanchin |ha hlutna a tidalin a lang. Pathian thiltih mak damlo tana taksa damna Chanchin |ha hminga kan han zuar tawp mai te hi ngaihtuah chian chuan ngaihthatthlak loh tak a ni. Isua leh a tirhkohte khan an tih awm kan hre reng reng si lo. An rawngbawlnaa damna chang chu an tam narawh e, mahse khatiang hmang khan tumah hip an tum lo va, miracle crusade an buatsaih ngai lo. Thilmak tih chu Pathian tih a Iiau liau a nih avangin sawi lawk theih a ni lo va, a thlen dan tur pawh kan hre lawk thei lo a ni. A tidam thei tih erawh kan hre chauh zawk a ni.
Thlarau lam fiaratui dawnna hmun dik
Ringtu chu a mimal nunah leh rawngbawlnaah kraws kawng pumpelh tura thlem a ni reng a. Kawng zawh itawm a tak zawk niin a lang thin bawk a. Mahse rawngbawlna kawng dik zawk, Kristian sakhaw nihphung zawk leh kawng thlarau zawk chu Kraws kawng a ni. Chu kawng chu mi hriat hlawhna kawng a ni kher lo, mi fak hlawh kawng a ni kher lo bawk; intih lar leh lal hrawtna kawng a nih hmel loh hle a ni. Chu kawng chu kawng nuam a ni lo va, tahna mittui leh thihna kawr ruam a ni fo. Amaherawhchu, chutah chuan thlarau lam fiaratui dam sawng sawngna chi a awm a, chutah chuan thlarau lam vitamin dik tak chu a awm a ni.
Lalpa i Pathian fiah kher lovin rinawmin Krista hnung zui mai zawk ang che. Tichuan, a nihna chu i pawh fiah ngei ngei dawn si a.