Kuhva leh buha sum chhuak Mizo iptea luhtir kan tum dawn – ZPM leader

Kuhva leh buh lei leh hralha sum chevel a tam thei ang ber Mizopa iptea a luh theihna’n hma an la dawn tih ZPM leader Lalduhoma chuan a sawi.
Thawhtannia an party office-a inkhawmah ZPM leader chuan kan tharchhuah ve reng, a sawngbawlna kan neih loh vanga sum tam tak kalral thin – kuhva, panhnah leh buha sum luangchhuakte Mizo ipteah a tam thei ang ber an luhtir dawn niin a sawi.
Mizoten kuhva kan ei nasa in, a chin pawh kan ching viau naa, kan intodelh lo hle tih a sawi a. ZPM Research Wing chhut dan sawiin, kuhva hi kan thla thum ei vel kan thar a, a dang zawng chu ram dang atanga lakluh a ni. Kan kuhva chin hi a kung chawpin Vai hoin an lei a, Assam-ah thawnthlain skop-in an siam a, kan thar ngei kha manto takin kan lei leh thin. Bawngkawn leh Zarkawtah ringawt thlatina lo thleng thin hi bag 10000 vel niin, chu chu cheng nuai 550 man vel a ni a, kum khatah chuan nuai 6600 vel an rut niin a sawi.
“Kuhva kan ei nasat avang hian intodelh dan dap a ngai a, a chin dan thlengin thlai dang nen hlawk zawka chin pawlh dan kan ngaihtuah a ngai. Farmer producer society kan din vek anga, chuta in-register te enkawltu tur service provider kan ruat anga, sawrkar hriatpuiin an kaihhruaina hnuaiah mumal zawkin kan kal dawn a ni. Kan ramah a skop siam kan tum ve anga, hand holding hmangin theihtawp kan chhuah anga, sum tam tak kan hum thei dawn a ni,” Lalduhoma hian a ti.
Kuhva hi ei tura siam bakah rawng siamna’n an hmang a, henglai hnaivai Vaiho thlawhkhumin a company tak takte nen indawrin tangkai leh hlu leh zuala siam dan an zawng dawn tih a sawi bawk.
Panhnah pawh kartin truck trip 9 vel Bawngkawn leh Zarkawtah a lo thleng a, kar khata kan eiral hi cheng nuai 36 man vel, thla khatah cheng nuai 144, kum khatah vaibelchhe 17 man vel kan eiral tih a sawi. “Kan intodelh ve a ngai a, sawrkar chakna nena kan beih chuan kan hlawhtling thei ngei ang,” a ti.
Economic Survey 2022- 2023 a a landanin, kum khata kan buh tharchhuah chu metric tonne 62182 a ni a, tlangram lo neih leh leilet atangin kumtin kan mamawh zaa 34 vel kan tharchhuak thei a, a bak chu FCI atanga lei niin, kan kham loh changin open market-ah tam tak lei a ngai, tihte ZPM hruaitu hian a sawi.
Kum 2022 chhunga sawrkarin buhfai subsidy tana a sen chu cheng nuai 5630 a ni, tiin, “A man ngaia lei hian mipuiin kan tuar dawn si a, open market-ah kan lei thin a, eng kaltlang pawhin nise Majumdar-a tih vek a nih avangin hengho atanga kan leite hi tute emaw sum siamna a lo ni leh a, mipuiin kan tuar nasa ta em em a ni,” a ti.
Buhfai kan tharchhuah hian kan mamawh engemawchen phuhru thei tura tan lak a ngai tih sawiin, ZPM a sawrkar chuan buh humin an lei anga, Pangbalkawna a herna khawlah an dah anga, khawl neitu leh FCI nen MoU ziakin hma an la dawn tih a sawi. Sawrkar leiba awmsa in a delh rih dawn avangin hma lak nghal theih loh mah se, buh hum chu lei an tum a, minimum support price an tihchian hunah sawhthing ang chiahin buh lamah pawh hma an la dawn tih a sawi.
“Sawrkarin leiba a ngah em avangin heng kan sawi zawng zawng hi a kum khatnaah beihpui kan thlak nghal thei lo maithei. Mahse kan ngaihpawimawh ber a nih avangin thapui thawhin hma kan la zui nghal dawn a ni,” ZPM leader hian a ti.