Kuhva tawlhruk ching tawmim
Bana Kaihah kuhva chin a tel
– Chief minister
Dan loa ramdang kuhva tawlhruk chingte chu an sawrkar hnu ah an tawmim ta hle tih chief minister Lalduhoma chuan a sawi a. Tualchhunga kuhva ching duh tana Bana Kaihah an dah tel a, diltu pawh 400 chuang an awm tawh tih a sawi.
Land Resources, Soil & Water Conservation department chuan Zirtawpni khan Aizawlah kuhva chingtute tan tunlai thiamna hmang tangkaia kuhva kung enkawl kawnga an hriat tur tul an zirtir a. Hmanpuitu chief minister chuan, Myanmar atanga dan loa kuhva lakluh a nih thin avangin kan rama kuhva chingtuten an hralh tha hleithei loa, sawrkarna an lak ve leh he harsatnate hi tihtawp tumin hma an la nghal chat a. Home minister a tang hle a, man pawh an man nasa tih a sawi.
“Kuhva tawlhruk chingte an tawmim tawh hlein ka hria a, zaa za tihrem nghal barh chu a harsa deuh a, kan la bei zel dawn,” a ti.
Tlangram vata lo neih kan la uar viau laiin, a hlawk si loa, ram a tichhe nasa bawk si a. Huan nghet neia hma lak a tul hle tih a sawiin, “Chutiang atana tha chu kuhva hi a ni. Kan sik leh sa a inthlak zel avangin Mamit leh Kolasib ah chauh ni loin district dangah pawh a chin chhoh theih tan a. Ministry of Agriculture & Farmers Welfare leh Ministry of DoNER in kuhva chin belh zawnga hma lak remti chiah tawh lo mah se, kan sawrkar hi chuan a duh apiang chin tir zel kan la tum,” a ti.
Tunah hian kuhva bikah Bana Kaih tanpuina diltu mi 318 leh CM Special Package diltu 93 an awm tih a sawi a ni.
Tualchhunga kuhva chingtute harsatna chinfelna atan leh hlawk zawka kuhva an hralh theihnan sawrkarin a sawngbawlna lam din tul a ti a. North Eastern Council-ah cheng vaibelchhe 7.43 an thehlut a, an rawn sanction tawh tih chief minister hian a sawi. “Chemphaiah leh Zamuangah Kuhva Processing Unit din kan tum a, khawl hmangin kan tiro anga, a khehna kawrin leitha kan siam anga, a rah hmin thate a skop-ah kan siam anga, a hawngte chu plate-ah siam kan tum bawk,” a ti.
Nikum chhung khan Mamit district-a kuhva tam enkawlna tur damdawi sawrkarin cheng nuai 33 man a pe a. An la indaih lo hle tih an hria a, a tul angin an ngaihtuah zel turah a ngai tih a sawi a. Mithiam an mamawhna an hria a, damdawi an pek hi tangkai zawka an hman thiam theihnan training hi buatsaih a ni tih chief minister hian a sawi bawk.
8 Kuhva chingtute kohkhawmnaah hian kuhva chin lama chawimawi tlak mi pathum hnenah lawmman hlan a ni.
8 Mizorama kuhva chin bultantu kum 1965 atanga ching tantu Lalbiakseia, Bilkhawthlir; Mizorama kuhva kung ngah ber, kung singthum chuang neitu Saikhalha, Zamuang; kuhva leh kuhva enkawl dan tawnhriat tha tak neia midang tanpuitu Zamzela, Tuikhuahtlang te an ni.
8 Mizoram Kuhva Chingtu Pawl a ding tawh a, dan loa kuhva lakluhin an kuhva hralhna lamah harsatna nasa tak a siamsak avangin pawl hi an din ta tih an sawi.
8 LRS&WC-in training an buatsaih chhan hi, kum 2021 chho atanga kuhva a tam tan khan department chuan a zirchiang a, a natna leh a damdawi tur hi an hmuchhuak tawh a, nikum khan Mamit district lamah chuan a damdawi hi nuai 33 man an pe chhuak a ni. Chutihrualin huan neitu thenkhatin an lo hmang thiam tawk lo tih an hriat avangin training hi an buatsaih a ni.
Kuhva tawlhruk ching tawmim Bana Kaihah kuhva chin a tel – Chief minister
