Mathew Antony thusawi dang
8 Modi sawrkar hnuaiah India ram leiba a let thumin a pung tawh. Kum 2014-a leiba cheng vaibelchhe nuai 55 a neih chu tunah chuan vbch. nuai 185 a ni tawh. Heng zawng zawng hi thla reilote hnuah a liam dawn a. Kum 10 chhung rorelna dik lo chu a liam dawn.
8 Thil man a sang zel a, gas cylinder man chu a let hnihin a pung tawh. Diesel leh petrol man chu international market-a crude oil man a tlahniam chungin a let hnihin a to tawh bawk.
8 Sipai atana inlak dan tha tak, system awm reng chu hnawlin BJP sawrkar chuan Agnipath scheme a kalpui a. Defence forces leh India defence chu ‘contract labourers’ hnuaiah a dah tihna a ni. Agnipath scheme hi contract basis-a sipaia mi kum 4 tantir ang a ni mai. India security tan a tha loa, thalaite career tichhetu a ni dawn. Kum 4 hnuah hna an nei lo mai dawn.
8 Modi hian kum 2022 a nih meuh chuan loneitute sum lakluh chu a let hniha tihpun a tiam a. Kum 10 a ral tawh a, loneitute sum lakluuh chu inflation sang leh input cost hrang hrang vangin a tlahniam char char zawk.
8 Foreign bank-a black money dahah Modi hian Congress puhin, chu’ng chu lak let vek a nih tur thu leh India mi tin bank account-ah nuai 15 theuha dahsak a tiam a. Hei hi tun thlengin a la thleng lo tih a sawi.Kum 10 chhungin Modi kaihhruai sawrkarin a intiamna a tihhlawhtlin loh avanga mipui harsatna chu MP inthlapuia INDIA-in sawrkarna a lak hnu ah siamthat a ni dawn tih Congress national spokesperson Mathew Antony chuan a sawi.
BJP kaihhruai sawrkar chuan centre hnuaia agency hrang hrang thuneihna hmangsualin anmahni dodaltu tur chu dahboa tih chhiat dan a dap zel tih a sawi a. Tunhnaiah Congress thalai sum dah pawh chhuitirin, BJP-in bank-a cheng vaibelchhe 6000 a dah erawh, engtia an neih nge tih chhui a ni ve lo tih a sawi.
2014 MP inthlan dawnin Narendra Modi hian kumtin thalai vaibelchhe 2 tan hna thar an siam ziah dawn tiin, mipui a tiam a. A sawi atanga chhiar chuan thalai vaibelchhe 20 hnenah hna pe tawh tur a nih laiin, hei hi a thleng loa, India rama unemployment rate chu kum 45 chhunga a san ber lai kan tawng mek zawk tih AICC thupuangtu hian sawiin, “central sawrkar department, corporations/PSUs ah ringawt pawh hnaruak nuai 30 a awm mek,” a ti.
Hmarchhak mi tam zawk chu schedules tribe list-a awm an ni a, centre-a BJP sawrkar chuan chi leh sakhuaa minority-te dikna chanvo chu tih bawrhban sakin anmahni duhzawngin a kawih her sak a, an tuar nasa hle tih AICC i/c North East Mathew Antony hian a sawi. Congress sawrkar laia Manipura hnam leh hnam buaina a chhuah tumin, PM Manmohan Singh chu a kal nghal a, remna ban a phar a. PM Modi erawh chuan Manipur buainaah a beng a chhungawng tlat thung si tih a sawi bawk.
Heng thil hrang hrang hi Lok Sabha inthlanah tibo turin INDIA a sawrkar theih nan Mizoram mipui chu Congress candidate vote pui turin a sawm a ni.
Kum 10 chhunga BJP sawrkar tih dik loh kan siamtha dawn – Mathew Antony
