Kum 20 chhung lottery number ngai a hman hnuah a vannei ta
Michigan a cheng pa pakhat chuan kum 20 chhung lottery number ngai hlir hmanga a khelh hnuah a vanneih pui ta a, Lotto 47-ah dollar maktaduai 32.91 manin, Michigan Lottery official-te chuan Michagan Lottery-a man tam ber a la nih thu an puang.
A hming tarlan loh, Macomb County a cheng, lottery mantu hi kum 73 mi a ni tawh a, kum 20 kalta atang khan Lotto 47 khel tanin, vanneih tumin number ngai 02-03-12-15-16-33 a hmang char char a, beidawng lova kum 20 chhung zet he number hi a hman hnuah a vanneih pui ta nge nge a ni.
Lottery mantupa chuan, “Lotto 47 hi kum 20 chhung ka khel tawh a, number ngai char char ka hmang,” a ti a. December ni 13, 2025-ah pawh he number bawk hi lei lehin, Lotto 47 a lawmman la tamna ber a man ta nawlh mai a. “Ka ticket ka han endik a, number pathum a inmil tih ka hmu nghal a. ‘E he, dollar 5 chu ka hmu let leh dawn phawt e,’ ka ti rilru a. Mahse, number dang zawng pawh a lo inmil vek tih ka hmuh chuan ka mit ka nuai a, ka ticket chu ka ennawn leh a, mak ti takin ka en ta reng a,” a ti.
A tirah chuan amah ngei pawhin a awih loh zawk hial a, “Ka fate phone a biain ka hrilh ve nghal a, mahse, anni pawhin an awih bik lo a, hmanmawh takin ka ticket en turin an rawn kal a. Kan phur tlang teh asin! Hetiang khawpa tam lawmman man te chu kan inbeisei ngai reng reng hleinem,” a ti bawk.
A lottery man chu engtin nge a hman dawn tih an zawh chuan, “Zep lohah chuan ka rilrua rawn lang hmasa ber chu pheikhawk thar lei a ni. Ka chhungte pawh ka sem ve ang a, car thar te pawh ka lei ang chu,” a ti.
Kum 20 chhung lottery number ngai a hman hnuah a vannei ta
