Aizawl Smart City Ltd. bultumin nimin khan Aizawl college-ah national symposium on “vision Aizawl city after 20 years” neih a ni a. He symposium-in a tum ber chu, kum 20 lo la awm tura Aizawl khawpuiin harsatna a tawh theih hrang hrang pumpelh dan tur emaw a sutkian dan tur emaw sawihona a ni a, thupui hrang hrang – mobility, infrastructure, local governance etc. chungchang kaihhnawihte sawiho a ni a, a pawimawh hlawm hle.
Dr APJ Abdul Kalam khan ‘Letter written in the year 2070’ presentation a siamah khan, lehkhathawn ziaktuin a naupan laia hnianghnar taka tui an hman thin dan te, ni khatah tui no 8 tal in tura an infuih mawlh mawlh thin thu leh, tun (2070)-ah chuan ni khatah tui no chanve pawh in tur an neih tawh loh thu te, eitur 80% chu synthetic (natural atanga siam ni lo, chemical hmanga siam) vek a nih tawh thu te, tui inchuhnaa silai chelek chu thil thlen dan pangngai a nih tawh thute a ziak a; thildang tam tak harsatna a thlen dan pawh a ziak.
He Presentation-in a tum chu, tun ang renga kan khawsak a, tui leh environment humhalh nachang kan hriat loh chuan, kum 2070 a lo thlen meuh chuan hetiang hi kan dinhmun tur a ni, a tihna a ni deuh ber.
Hetiang deuh hian, keini pawhin kum 20 lo la awm tur ‘2044’ hi kan thlentir chhin a pawimawh dawn hle. Tun dinhmun ang renga kan khawsak a, tuna harsatna thleng mekte sutkian dan tur kan ngaihtuah that loh a, hma lak nachang kan hriat loh chuan, tuna symposium-a thupui pawimawh tak tak kaihhnawih, kawngpui thar (ring road etc) siam belh loh avanga traffic tawtin harsatna a thlen dan turte mitthla chhin ta ila. Chutiang bawkin infrastructure lamah te, local governance lamah te pawh; sawi tur a tam hle.
Aizawl khawpui hian infrastructure dang (kawng chhawng, building construction etc) rit pui pui dah belh hi a dawl meuh tawh lo niin a lang a, khawpui pawn lam ram awl hi chhawr tangkai dan kan dap zel a ngai tawh niin a lang. Tuna awihpanga building rit pui pui thenkhat hi chu, kum 2044 thleng zo lo tur an awm nual tawhin a rinawm a, a thiah dan (demolition procedures) siam a pawimawh dawn niin a lang a; chuti a nih loh chuan, vanduai mangkhawnga chang mai thei tur hi Aizawlah hian a awm deuh fur tawh niin a lang.
Hma lam hun thui tak thlir chunga ruahmanna kan siam thin hi a pawimawh tih chu, tunhmaa hmathlir thui nei lo leh ruahmanlawkna tel lova Aizawl a lo indin dan atang hian a zir chhuah theih mai awm e, kan hmu tlang vek a nih hi.
Kum 20 hnuah Aizawl…
