Kum 20 tlin hnua medical test neih tur pawimawh te

Kan buai em avangin thil te hi kan theihnghilh remrum thin a, chuvangin kan theihnghilh min hriatchhuah tir turin reminder te kan set a- kan hmangaih te pianchampha, bill pek tur, mi biak tur, appointment siam tur leh thil chi hrang hrang a tam khawp mai. Mahse, thil pawimawh tak reminder set-na chang kan hriat miah si loh chu regular medical check-up hi a ni! Kan taksa hriselna atana pawimawh, medical test leh screening te a hun taka neih thin hi kan ngaihthah leh tlat lawi si a. Tun tumah hian Times of India health section-in puitling, kum 20 chin chunglam tana medical test neih thin tura pawimawh ni a an sawi te kan rawn tarlang e.
1. Blood Pressure: BP sang hian taksa hriselna a khawih pawi thei hle mai a, thluaka thisenzam chat/block (stroke), kal tha lo (kidney failure), lung natna te pawh a thlen thei. BP chu kum 20 pelh tawh chinah chuan kumtin check tur a ni, a normal chuan kum khatah vawi khat a tawk mai a, a normal loh deuh chuan thla tin check tur a ni.
2. Cholesterol: Cholesterol sang hian lung (heart) natna risk a tisang a, kum 20 kan pelh chiahin cholesterol hi test tur a ni. LDL (cholesterol chhe chi) chu 130 aia a san chuan kumtin check ngei ngei tur a ni. A normal chuan kum thum danah tal i check dawn nia.
3. STD screening: Mipat hmeichhiatna i inhmang tawh a, kawppui pakhat aia tam emaw, a thar emaw i nei a nih chuan chlamydia leh gonorrhoea te kumtin test tur a ni. A test hi awlsam taka neih mai theih a ni.
4. Clinical breast examination: American Cancer Society chuan hmeichhia kum 20 chunglam chuan kum thum danah clinical breast examination neih tur niin an recommend. Mahni-a in check bakah hetiang lam te kum thum danah rawn tur a ni. Hei hian hnute cancer a pumpelh tir thei tihna lam ni lovin, hnute cancer a awm chuan hriatchhuah hma theihna a ni a, treatment lak hma chuan dam lehna chance pawh a sang zawk em em a ni.
5. Pap smear: Pap smear chu hmeichhe tana cervical cancer thlen thei a awm em tih enna a ni a, American College of Obstetrics ans Gynaecology chuan hmeichhiain mipat hmeichhiatna vawi khat an hman tawh chuan, kum 21 an pelh hnuah chuan kumtin vawi khat tal pap smear test hi neih tur niin an recommend.