Kum 2022 atanga a hnulama African Swine Fever avanga vawk suattuten sawrkar atanga zangnadawmna an hmuh tur an la dawng lo.Sawrkar laipuiin kaihhruaina a siamah ASF vanga vawk thite tan zangnadawmna pek theih a ni loa, ASF a darh zel lohna tura vawk suattute chauh zangnadawmna pek theih a ni.
AH & Vety department chhinchhiah danin kum 2021-a ASF vanga vawk suat zat an thehluh angin sawrkar laipuiin zangnadawmna cheng nuai 584.97 a pe a, Mizoram sawrkarin matching share nuai 384.97 a tum ve nen a vaiin nuai 1169.94 chu an vawk upat dan azira pek zat tur duan sa angin vawk vulhtu 2488 hnenah sem a ni.
Kum 2022-a ASF vanga vawk suat te tan sawrkar laipuia zangnadawmna nuai 1053.26 a dil laiin, sawrkar laipui hian nuai 131.66 a rawn pe a, hemi zat tho hi state sawrkarin a tum ve tur niin, a vaiin nuai 263.32 hmuh a ni tawh a, hei hi pekchhuah a la ni loa, pekchhuah thuai beisei a ni tih sawi a ni.
Kum 2023-ah ASF vanga vawk suatte tan sawrkar laipuiah sum dil leh niin, Rs. 74,70,800 dil chu National Steering Committee-in a pawmpui tawh tih sawi a ni bawk.
Kum 2023 thleng khan Mizoramah ASF vangin vawk 47351 a thi tawh a, ASF darh zel loh nan kai nia rinhlelh vawk 25234 suat an ni tawh bawk.
Kumina a vawi thumna atana Mizorama ASF leng mekah nimin, August 27 thleng khan vawk 11062-in an thihpui tawh a, vawk 19370 suat tawhin, district 9-a khaw 214 a nghawng tawh a ni.
Kum 2022 atangin ASF vanga vawk suatten puihna hmuh tur la dawng lo
