Kum 2024 chhung khan Indian nuai hnih chuangin khua leh tui nihna an hlip tih Ministry of External Affairs (MEA)-in Ningani khan a sawi a. A zat hi a hma kum aiin a tlem hret niin sorkar chhinchhiahnaah tar lan a ni.
Minister of State Kirti Vardhan Singh-a’n parliament fur thutkhawm kal meka Rajya Sabha-ah zawhna chhangin Indian zinga khua leh tui nihna hlip zat hi a sawi a ni.
Kum 2024-ah hian mi 2,06,378-in Indian an nihna an kalsan a, 2023-ah 2,16,219, 2022-ah 2,25,620, 2021-ah 1,63,370, 2020-ah 85,256 leh 2019-ah 1,44,017-in khua leh tui nihna an hlip tih a tar lang bawk.
MEA hian Indian zinga an khua leh tui nihna kalsan an pung em tih zawhna a chhannaah hian chhinchhiahna atang chuan an pung lem lo nia a ngaih theih thu tar lan a ni bawk.
Sorkar hian Indian zinga khua leh tui nihna kalsan duha dil an awm hian dan anga tih ngai awm angin thil a kalpui a, nihna hlip tur hian a diltuah thil phut a awm a, chu chu an nei em tih finfiah hmasak thin a ni.
Khua leh tui nihna kalsan duhte hian online-in dilna an thlen hmasa a. An passport leh an nihna kimchang finfiah a nih hnuah a khawihtu sorkar department-ah thawnin an ni hian ni 30 chhungin an chan leh khawih tur chin an khawih thin.
Khua leh tui nihna hlip tura mamawh ang a neiha engkim pawm a nih hnuah a nihna hlihsak a ni tih chu pawmpuina lehkha tihchhuah a ni a, an dil atanga 30-ah online hmang veka hriattirna pek leh thin a ni.
Kum 2024 chhungin Indian nihna hlip nuai hnih chuang awm
