Kum 2027-ah chuan political party leh pawl dangten Remna Ni chu remna ni a nih ang taka a huhoa hmang a, programme dang siam lo turin an sawm tih Mizo Zirlai Pawl president Dr C Lalremruata chuan a sawi.
MZP Gen. Hqrs. chuan kum danga an huaihawt thin angin kumin Remna Ni chu Thawhlehni khan an hmang a. MZP president hian, Remna Ni kan hman thin chu inremna aiin inhnialna chawkchhuaktu mai a ni dawna hria in MZP chuan kum 2017 khan Remna Ni hman a rel a, kum 2018 atanga hman tan a ni tih a sawi.
Sawrkar pawhin program dang siam loin he hun an buatsaih hi a pawm mai thin tih a sawi. Tu pawh sawrkar se, Remna Ni hi MZP-in hman zel an tum a, political party-te leh pawl thenkhatin a hrana hmang loin, nakumah chuan Remna Ni a nih ang taka a huhoa hmangho tur leh program dang siam lo turin a sawmin a ngen tih a sawi a ni.
Mizoram chu mahnia ro inrel turin independent puan a ni a, India chuan Mizoram chu ralpui phiara phairin kum 1967 bul lam atangin khua a sawikhawm tan a, hei hian Mizo nunphung nasa takin a tidanglam a, jet fighter hmangin mipui nunau pawisawilote min bei tih Dr C Lalremruata hian a sawi. “Chu ni lungchhiatthlak tak champha chu MZP-in serhin ‘Zoram Ni’ tiin kum 2008 atang khan kumtin kan hmang ta a ni,” a ti.
Zofate chu khawvel ramri pathumin min daidang a, Mizoram state tih loh chu tunah buaina in a chim mek tih pawh sawiin, “Unau kan indoin tunge dingchhuak thei ang, kan zavai hian inrem takin awm ila, bil bil, bik bik awmloin, rinawmna chibai inbuktawna inrem turin kan chah a ni,” a ti.
Kum 2027-ah chuan a huhoa Remna Ni hmang turin sawm
