Aizawl to Lunglei kawng, ATL Road – Kanghmun South leh Lunglei inkar chu kum 4 chhungin siam zawh a nih tur thu PWD minister Vanlalhlana chuan a sawi a. A siamna atan ATL Road avanga sum hmuh let vaibelchhe 90 atangin vbch. 45 dah a ni tih a sawi. Lunglei MZP chuan sum pawhpen hi hrethiam loin ni 15 chhungin ATL Road atan dahlet leh vek turin sawrkar an phut thung. PWD minister-in Lungleia thuthar thehdarhtute hmaa a sawi danin, World Bank-in ATL Road a siam zawh hnuin Kanghmun South leh Lunglei inkar (100-164Kmp) thawmthat leh enkawl zuina atan sawrkarin kum 2017- 2025 thlengin cheng vaibelchhe 118.28 a pe chhuak tawh a. Kum 2024 & 2025 chhungin vbch. 63.07 pe in, hei hi kawng siamna atana pek tawh atangin zaa 53.32 a tling tih a sawi.
ATL Road hi World Bank hunlaia siam a nih khan lirthei phurh rih zawng, 1 msa (million standard axles) thleng dawl zo turin kawngpui hi 380 mm-a chhaha siam a ni a, kum 15 chuang a vei hnuin lirthei rit tak tak beisei aia tam a tlan tak avangin traffic count neih that a ni a, tunah chuan 4msa dawl zo turin kawng chhuat chhah zawng pawh 485mm a nih a tul tawh tih a sawi a ni.
Kawng enkawl zui duh loh avanga sawrkarin court-a a khin tak contractor, Bhagheeratha Engineering Ltd security deposit leh a pung cheng vaibelchhe 90.69 chu sawrkar sum bawm (consolidated fund) a a luh hnuah kawngpui pawimawh leh ngaihmawhawm zual lai siamthatna atan ruahman a ni tih PWD minister hian a sawi a. Aizawl khawpui chhung kawng siamna atan pawh dah tel a ni tih sawi.
ATL Road Lunglei lam chin siamthatnan Phase-I ah cheng vbch. 45.89 ruahman phawt a ni a, a tahtawla a tul anga phase dang ruahman tum a ni, tiin, Kanghmun South leh Lunglei inkar siamthat hna hi sawrkar kum 4 (2024/25 – 2027/28) chhungin zawh fel vek tum a ni tih a sawi a ni.
Hetihlai hian MZP Hqrs. Lunglei thuchhuak chuan, ATL road siamna atana Mizoram Legislative Assembly Estimate Committee-in cheng vbch. 90.69 dah tura a recommend an pawhpen tawh dah let turin an ngen tih a sawi. Finance changtu chief minister chu Estimate Committee recommend ang ngeia ATL road siamna tur Aizawl khawchhung siamna atana an pawh pen chu dahlet turin an phut tih a sawi bawk.
‘Ni 15 chhunga sum pawhpen hi dah let a nih loh chuan MZP Hqrs. Lunglei chuan a tul angin hma a la chhunzawm dawn,’ a ti.
Lunglei West bialtu Pu T Lalhlimpuia’n tuna kawng siam tur, Mausen- Pukpui bak zawng chu Central Road Research Institute zirchian hnuah DPR siama thawh a nih tur thu a sawi pawh zirchian a nih hnua DPR siam a nih leh nih loh enzui an tum tih a sawi a ni.
Kum 4-a ATL Road siam zawh tiam MZP-in vbch.90 dahlet vek an phut
