Kan hma lawka inthlang mai tur kan ni a; ni 10 vel chauhvin min kardan ta. Kum nga chhunga kan aiawha rorel tur kan thlang leh dawn a ni a, inthlanna hi khua leh tui tha chuan uluk takin a hmachhawn tur a ni a, tih takzet rilru pu chunga vote kan thlak theuh chuan roreltu tha tak hi Chunglam pawhin min ruahmansak ngei a rinawm a ni.
Mipuiin kan aiawha rorel tur thlang turin kum nga danah vawikhat chiah vote kan thlak thei a; chu pawh chu kan thlak peih lo a nih chuan, ram inrelbawlna a chhiat a thatah mawhphurhna lak kan tum lo tihna a ni a. Eng pawh kan chungah thleng se, phunnawi thei kan ni lo vang.
Heti hian tehkhinna a siam theih awm e: Khaw pakhata cheng mipuite chuan lo zau tak an inneih tawm a. Lova hna thawk tur chu in tin atangin aiawh pakhat theuh tirh tur a ni a. Nang chuan aiawh tir ve duh ta lo la, emaw; i tirh pawhin hna thawk tha thei lo tur tih i hriat chian sa pakhat chu run dalah uluk lo takin tir ve hram ta la. Lo atanga buh leh thlai tharchhuah chungchangah a phunnawi peih berah tang leh si ta la. Midang chuan, “I aiawha hna thawk tur pawh tir ve duh si lo, emaw, i aiawha i rawn tirh ve chhun lah chu zawmthaw si, hna pawh thawk tha thei lo a la ni lehnghal,” tiin emaw lo chhuahchhal ta che sela, inthlahrung taka ngawih dek mai lo chu tihtur i nei lovang.
Kum nga chhung hian ni 1825 a awm a, ni 1825 dana vote vawikhat thlak tura ni khat hun kan inpe thei lo emaw, kan inpe duh lo emaw a nih chuan, ram inrelbawlna thil a chhiat a thatah, sawisel thei tur kan ni awm lo ve.
Ni 1825 chhung hian hmun dangah kan awm bo daih pawh a ni thei e; kan aiawha roreltu tur thlan hun a lo thlen hi chuan, vote thlak tura mahni khaw lam pan vang vang hi, insengso deuh dawn pawh ni ila, insensona hlawk leh duhawm a ni a; a chhan chu roreltu tur i thlang thei dawn miau a.
Kum 5 danah vawikhat…
