Tunhnaiah MNF party-in thalaite pual bik SEDP ruahmanna an siam chu chauhthubarawh mai a ni tih ZPM chuan sawiin, kum 5 chhunga an hmuh hmaih thalaite an ngaihtuah thar thut tih an sawi.
ZPM Political Affairs Committee member TBC Lalvenchhunga chuan MNF party-in tlaikhawhnuah SEDP thalai oriented an tih thar chu chauhthubarawh mai a ni, tiin, kum 5 chhunga an hmuh hmaih thalaite ngaihtuah thar thut anga an lan leh chhan chu thalaiten an hrethiamin an ring tih a sawi.
“Mizoram voters-ah kum18-39 inkar hi zaa 60 chuang an ni a. Thalaiten tuna kan sawrkar hrawn mek aia tha beiseiin, sawrkar thar, awmze neia Mizoram kaihruai thei tur hmuh an chak tawh hle niin kan hria a. Kalphung thar mipui sawrkar siam turin thawhho puiah kan sawm a ni,” a ti.
MNF leh Congress ten thlalak /video/ thuziak leh a dangte hmangin mipui sukthlek tih danglam tumin, tuna ZPM an chak chuan BJP nen inzawm tur angin dawt hmangin thu an thehdarh tih a sawi a. Zoram mipui tumah awihlo turin an hriattir lawk tih a sawi a ni.
“Chiang taka kan sawinawn duh chu, BJP nen hian kan thawk dun dawn lo. Mipuiin an rilrua sawrkar an mitthla chu sawrkar intawm (coaliation) a ni lo tih kan hria a. A bikin ringlomite nena sawrkar intawm siam phei chu an mitthlaa awm a ni lo lehzual,” a ti.
MNF chu vawiin thlenga BJP nena thawk dun, NDA atanga inhnukdawk ngam lo an ni tih ZPM PAC member hian a sawi a. “Ram leilungfate kan duhsak ang, ti thintute kha hnam rilru pu an ni thin a. Mahse, MNF hi tunah chuan an pu ber hian a lerah hnamdang kan ram sum leh pai a lo tlanpui a. Hnam a phatsan tawh. In biala MNF candidate chu a fel viau a ni mai thei, i thlantlin chuan Abu Mazumdara te, Kamrula te leh an phena ding Pu Zoramthanga te duhtawka tal zel turin i thlangtling tih hre turin mipui kan chah a ni,” a ti.
Congress-in ZPM an puhna hrang hrang enin chhan tlakah an ngai loa, tun inthlanah ZPM hmanga contender anga mipui hmuha inlantir a, tel ve hram an tumna hmanraw chikhatah an ngai tih a sawi a ni.
Kum 5 liam hnu ah MNF-in thalaite ngaihtuah thar thut
