Mizoramah HIV AIDS a hluar a, hmuhchhuah thar pawh an awm kum tin. Tun hnai kum ruk chhungin HIV+ hmuhchhuah zat chu 11032 a ni.
Tuirial bialtu K Laldawngliana zawhna, ziaka chhan chi chhangin health minister Lalrinpuii’n HIV+ hriatchhuah zat hi House a hrilh a, sorkar kum kal lai 2025-26-ah pawh July thla thlengin mi 611 hriatchhuah an awm tawh tih a sawi. 2025-ah April atanga July thlengin mi 611 hriatchhuah an ni hman tihna a ni.
Health minister hian 2020-21 atanga 2025-26 (July) thlenga Mizoram dinhmun a sawi a, HIV+ hmuhchhuah zat hi pung thur thur chu ni lo mah se a tam tham.
HIV+ hmuhchhuah tam ber kum chu 2022-23 kha a ni a, mi 2388 an ni. A tlem ber kum 2021-22 khan mi 1774 hriatchhuah an ni.
2020 atanga 2025 July thla thlenga HIV+ vanga nunna chan zat pawh House a hrilh a, mi 2996 an ni. 2025-ah July thla thlengin HIV+ vangin mi 295-in nunna an chan tawh.
Health minister chhannaa a lan danin, 2020-ah HIV+ vangin mi 521 an boral a, 2021-ah mi 425, 2022-ah mi 562, 2023-ah mi 632, 2024-ah mi 561 an boral.
HIV+ hmuhchhuah zat
Kum HIV+ zat
2020-21 2059
2021-22 1774
2022-23 2388
2023-24 2179
2024-25 2021
2025-26 611
(Jul thleng)
Total 11032
Kum ruk chhungin HIV+ 11000 vel hmuchhuak
