Kum tharah Aizawl khawlai a fai ve deuh

Kum a thar a, rilru thar put hun a ni. Aizawl khawlai pawh a fai ve deuh kuar a, ruihhlo sulhnu a hma angin a nasa lo.
Ruihhlo do kum puangtu YMA-in Krismas hma atang khan ngawrh takin ruihhlo do hna an thawk a, hei hi khawlai fai ve deuh chhan pawh ni tura ngaih a ni.
Ruihhlo do hna thawkin Krismas urlawk ni khan Central YMA hruaitute an hnatlang a, police leh excise force te an tel bawk. Ruihhlo buaipuia khawlaia chetlate an khawm a, chumi hnu chuan khawlai a zia ta deuh niin a lang.
Central YMA office atanga thu dawn danin, December ni 24 zing dar 4 vel atangin an hnatlang a, hemi ni hian hmun lun laia che mi 100 vel an khawm. An zinga mi 68 chu |BCC-ah an dah a, mipa 42 leh hmeichhia 26 an ni.
‘|BCC-a dah loh te pawh an awm a. Kan dahte hi a hnuah doctor-in a endik a, damdawite a chawh a, an thatpui kan beisei,’ Central YMA hruaitute chuan an ti. Hemi hnu hian Central YMA Kumpuan duty-te’n mi 10 vel an dah leh tih an sawi bawk.
‘Ina haw lova khawlaia riak mai thin te an ni nawk a, an khawngaihthlak khawp mai. Aizawl mi leh khaw dang atanga rawn kal an inpawlh,’ a ti bawk.
‘Aizawl khawlai pawh a hma ai chuan a zia rihah kan ngai a, a hmaa ngampa taka khawlaia ruihhlo zawrh leh khawih ang kha an ti ta lo deuh ni chuan kan hria,’ YMA hruaitu pakhat chuan a ti.
Aizawl khawlaiah ruihhlo leh a sulhnu hmuh tur a tam thin a, chhun pachangah pawh hmun lun ber berah thil hmuhnawm loh tak tak hmuh tur a awm thin. Tun hnaiah a zia ta a, YMA-in ruihhlo a do vang a ni emaw ni lo emaw pawh ni se, kum tharah hian a zia rih. A reh tawh chu a ni lo a, thil hmuhnawm loh tak tak hmuh tur chu a la awm. Aizawl hmun lun lai, Vanapa Hall bul vel pawh a zia a, mahse fai ta kuar chu a ni lo.